Mae nifer y cwynion yn ymwneud ag ynni a gyfeiriwyd at Ombwdsmon Ynni wedi codi 16% yn ystod hanner cyntaf 2026.

Dywed Ofgem fod hyn oherwydd y pwysau ar gyllid aelwydydd wrth i brisiau ynni gynyddu.

Yn ôl Ofgem, derbyniodd yr ombwdsmon 46,532 o achosion yn ystod y chwe mis hyd at ddiwedd mis Mehefin, cynnydd o’r 40,068 a gofnodwyd flwyddyn ynghynt.

Mae’r data’n dangos mai anghydfodau ynghylch biliau oedd yn cyfrif am y gyfran fwyaf o’r cwynion, sef 58%.

Cafwyd cyfanswm o 27,006 o achosion o’r fath, cynnydd o 15% o’i gymharu â’r flwyddyn flaenorol.

Roedd cwynion yn ymwneud â mesuryddion clyfar hefyd yn cyfrif am gyfran sylweddol, sef 10% yn yr ail chwarter, cynnydd o 6% dros yr hanner cyntaf.

Daw hyn wrth i Ofgem baratoi i gyhoeddi cynnydd yn y cap ar brisiau ynni ddydd Mercher, a fydd yn dod i rym ar 1 Hydref.

Mae’r rhagolygon diweddaraf yn awgrymu y bydd cynnydd o 4%, ar yr union adeg y bydd llawer o aelwydydd yn dechrau defnyddio eu gwres.

Dywedodd Ed Dodman o Ofgem: “Mae gan Ombwdsmon Ynni rôl bwysig i’w chwarae wrth sicrhau bod defnyddwyr yn gallu cael datrysiadau teg pan fydd pethau’n mynd o’i le, tra hefyd yn cefnogi cyflenwyr i ddatrys anghydfodau ac mynd i’r afael â gwreiddiau’r cwynion.

“Byddwn yn parhau i fonitro tueddiadau cwynion yn agos ac yn gweithio gyda chyflenwyr i fynd i’r afael â meysydd sy’n achosi pryder, gan sicrhau bod defnyddwyr yn gallu cael datrysiadau teg ac amserol pan fydd problemau’n codi.”

Fe wnaeth nifer y cwynion a dderbyniwyd am wasanaeth cwsmeriaid ostwng 5% i 3,500 yn ystod yr hanner blwyddyn.

Mae mwy o gwmnïau ynni hefyd yn hysbysu cwsmeriaid am eu hawl i gyfeirio anghydfodau at yr ombwdsmon ar ôl wyth wythnos neu pan fydd sefyllfa o anghytundeb parhaus (deadlock) wedi’i chyrraedd.