Mae uwch-dditectif wedi cael ei rhybuddio y gallai fynd i'r carchar ar ôl cael ei chanfod yn euog o gael mynediad anghyfreithlon at gofnodion heddlu yn ymwneud â ffrind gwrywaidd a thair menyw.

Roedd y Ditectif Arolygydd Emma Gardner, 46 oed, o Heddlu Gogledd Cymru, wedi gwadu cael mynediad heb awdurdod at ddeunydd cyfrifiadurol yn 2022. 

Ond yn dilyn achos yn Llys y Goron Caernarfon daeth reithgor i'r casgliad ei bod yn euog o'r drosedd.

Dywedodd y Barnwr Timothy Petts: "Mae hwn yn drosedd anarferol, ac mae’n anarferol i mi fod yn delio ag uwch-swyddog sy’n gwasanaethu fel diffynnydd."

Cafodd ei rhyddhau ar fechnïaeth tra bydd adroddiad cyn dedfrydu yn cael ei baratoi.

Ond dywedodd y barnwr wrthi: "Mae troseddau o’r fath gan swyddogion sy’n gwasanaethu yn cael eu trin yn ddifrifol iawn. 

"Nid wyf yn dweud mai dedfryd o garchar yw’r unig opsiwn, ond bydd hynny’n flaenllaw yn fy meddwl."

Achos camymddwyn

Ymunodd y Ditectif Arolygydd Gardner â Heddlu Gogledd Cymru yn 2000.

Bu’n gwasanaethu mewn amryw o rolau, gan gynnwys gyda’r Uned Diogelu Pobl Agored i Niwed. 

Dywedodd wrth y rheithgor ei bod wedi cael canmoliaeth am ei hymroddiad yn ystod un ymchwiliad.

Roedd ei chwymp yn gysylltiedig â rhannu gwybodaeth â dyn a oedd wedi gweithio fel dyn drws pan oedd hi’n swyddog heddlu yn y Rhyl. 

Roedd y ddau wedi dod yn ffrindiau ar Facebook ac wedi cael perthynas rywiol ddwywaith.

Dywedodd yr erlynydd, Andrew Scott, fod y ditectif wedi cael mynediad at gofnodion yn ymwneud â "chŵyn gymharol ddibwys" yn ymwneud â’i ffrind, a oedd yn cael ei drin gan swyddogion.

Mewn un neges, roedd hi wedi datgan: "Mae gen i fy nefnyddiau."

Mynnodd y swyddog nad oedd wedi edrych ar y cofnodion oherwydd ei pherthynas ag ef. 

"Rwy’n credu bod pob mynediad wedi bod at ddiben plismona," meddai’r Ditectif Arolygydd Gardner yn ei thystiolaeth.

Dywedodd y Dirprwy Brif Gwnstabl Nigel Harrison: "Rydym yn cydnabod penderfyniad y rheithgor.

"Mae’r swyddog wedi’i hatal dros dro tra roedd yr achos troseddol yn mynd rhagddo, ac rydym nawr yn bwrw ymlaen ag achos camymddwyn."