Mae tân yng ngwaith dur cwmni Tata Steel ym Mhort Talbot wedi achosi difrod sylweddol, yn ôl arweinydd undeb.

Cafodd Gwasanaeth Tân ac Achub Canolbarth a Gorllewin Cymru eu galw i'r safle ychydig ar ôl 20.00 nos Fercher.

Dywedodd Tata Steel fod y tân wedi effeithio ar un o linellau prosesu’r gwaith, a bod yr holl staff wedi gadael y safle’n ddiogel.

Roedd fideos o’r fan a'r lle yn dangos mwg trwchus yn codi.

Dywedodd Sharon Graham, ysgrifennydd cyffredinol Unite: “Diolch byth, ni chafodd neb eu hanafu yn y tân ac fe gafodd y gweithwyr eu symud o’r safle’n ddiogel.

“Fodd bynnag, fe wnaeth y tân achosi difrod sylweddol i linell gynhyrchu allweddol.”

Ychwanegodd: “Rhaid rhoi mesurau ar waith nawr i ddiogelu swyddi yn Tata ac ar hyd y gadwyn gyflenwi yn ystod unrhyw gyfnod o darfu.

“Yn y cyfamser, rydym yn gofyn i Tata a’r Llywodraeth sicrhau bod gweithrediadau’n cael eu hailadeiladu mor gyflym â phosib.”

Nid yw Tata Steel eto wedi cadarnhau bod y tân wedi achosi difrod sylweddol. 

Fe wnaethon nhw ddiolch i dimau lleol y safle a’r gwasanaethau brys am eu “gweithredu cyflym a phroffesiynol” wedi'r digwyddiad.

Image

Mae’r digwyddiad yn parhau ac mae timau ymateb yn cael eu cefnogi gan Wasanaeth Tân ac Achub De Cymru a Gwasanaeth Tân ac Achub Avon, yn ôl Gwasanaeth Tân ac Achub Canolbarth a Gorllewin Cymru.

Dywedodd y gwasanaeth tân fod criwiau o Bort Talbot, Castell-nedd, Treforys, Glyn-nedd, Gorllewin Abertawe, Cymer, Canol Abertawe, Pontarddulais, Llanelli, Caerfyrddin, Rhydaman, Gorseinon, Pontyates, Cydweli, Hwlffordd ac Aberdaugleddau wedi cael eu galw i’r safle.

“Dylai pobl osgoi’r ardal tra bod y digwyddiad yn parhau er mwyn caniatáu mynediad i’r gwasanaethau brys, ac mae trigolion lleol yn cael eu cynghori i gadw ffenestri a drysau ar gau os oes mwg yn yr ardal,” meddai'r llefarydd.

Image

'Heriol'

Cafodd gwirfoddolwr o Rapid Relief Team UK eu galw i'r safle i gynorthwyo'r gwasanaethau bryd a darparu prydau bwyd iddynt.

Dywedodd llefarydd ar ran Rapid Relief Team (RRT) UK: “Mae criwiau brys wedi bod yn gweithio drwy'r nos mewn digwyddiad mawr yng Ngwaith Dur Tata ym Mhort Talbot, a oedd yn cynnwys tân sylweddol.

“Gydag wyth peiriant tân, dwy uned ewyn, dau blatfform uchel a HVP ar y safle, roedd tua 100 o ymatebwyr yn wynebu noson waith anhygoel o heriol a pheryglus.

"Cyrhaeddodd gwirfoddolwyr RRT y safle o fewn 90 munud i'r galwad, gan weini 125 o brydau poeth drwy'r nos i’r criwiau wrth iddynt barhau â'u gwaith hanfodol.

“Rydym yn ddiolchgar i bob ymatebwr a ddaeth i ddigwyddiad mor heriol.”

Image

Daw hyn yn dilyn datganiad gan Tata Steel ddydd Mercher yn rhybuddio am "sŵn uchel" o'r gwaith dur wrth i waith i ddymchwel rhan o'r safle gael ei gynnal.

Dywedodd llefarydd ar ran y cwmni: "Efallai bod pobl sy'n gweithio ac yn byw yn ardal Port Talbot newydd glywed sŵn uchel yn dod o waith dur Port Talbot.

"Dyma ganlyniad i waith dymchwel y Daliwr Nwy Ffwrn Golosg gwag, diangen, sydd wedi'i gwblhau'n ddiogel fel rhan o'r gwaith peirianneg parhaus ar y safle.

"Rydym yn ymddiheuro am unrhyw anghyfleustra a achosir."

Yn fuan wedi'r sŵn, daeth adroddiadau gan bobl sy'n byw ger y safle eu bod wedi clywed larwm uchel o'r safle, cyn i fwg du trwchus ddechrau codi o fewn y ffatri.

Llun: PA/Yvonne Courtney