Mae tafarn gymunedol yn Eryri yn chwilio am denantiaid newydd lai na blwyddyn ar ôl ailagor.

Roedd y gymuned leol wedi codi bron i £200,000 i brynu prydles y dafarn.

Cafodd Menter Y Ring Cyf ei sefydlu gan bobl leol yn ardal Llanfrothen ger Porthmadog, er mwyn cymryd rheolaeth o dafarn Y Brondanw Arms yn y pentref yng Ngwynedd, tafarn sy’n cael ei hadnabod yn lleol fel Y Ring.

Ym mis Ebrill 2025, fe gyhoeddodd y fenter eu bod wedi llwyddo i godi digon o arian i dalu am brydles y dafarn, ar ôl gwerthu £197,100 o gyfranddaliadau. Ailagorodd Y Ring fel tafarn gymunedol yn Awst 2025.

Ond mae’r pwyllgor bellach wedi penderfynu dod â’r denantiaeth bresennol i ben.

Bydd yn dod i ben ar 10 Awst 2026, yn dilyn cyfnod rhybudd o dri mis.

Dywedodd cadeirydd Menter Y Ring, Osian Gruffydd, wrth Newyddion S4C mai “newid dwylo” oedd hyn, “yn hytrach nag unrhyw beth mwy na hynny”.

“Mae’r dafarn dal yn nwylo’r fenter a’r gymuned,” meddai.

“Ar ôl ystyried y peth yn hir ac yn fanwl, mae Pwyllgor Menter Y Ring yn gwneud y penderfyniad anodd i ddod â’r denantiaeth bresennol i ben er mwyn sicrhau sefydlogrwydd tymor hir,” meddai.

“Ond gan fod hon yn broses sy’n ymwneud â materion preifat, cytundebol, fedrwn ni ddim gwneud sylw pellach.

“Rydyn ni’n gobeithio am drosglwyddiad esmwyth, ac eisiau diolch i’r tenantiaid am fod yn rhan o siwrne’r Ring, a dymuno’n dda iddyn nhw.”

Dywedodd Mr Gruffydd y byddai’r fenter yn ceisio sicrhau bod cyn lleied o darfu â phosib ar wasanaethau’r dafarn yn ystod y cyfnod nesaf.

Mewn diweddariad ar gyfryngau cymdeithasol, dywedodd Menter Y Ring ei bod yn ymddangos bod y dafarn ar gau ar hyn o bryd yn dilyn y cyhoeddiad.

Dywedodd y pwyllgor eu bod yn gobeithio y bydd y dafarn yn gallu parhau i weithredu yn ystod y cyfnod rhybudd.

Wrth gael ei holi a fyddai’r dafarn yn dod dan reolaeth y pwyllgor yn hytrach na chael tenantiaeth newydd, dywedodd Mr Gruffydd fod Menter Y Ring yn ystyried gwahanol fodelau.

“Mae’r opsiynau yma i gyd yn bethau fyddwn ni’n eu hystyried yn ystod y cyfnod nesa,” meddai.

Pan holwyd a oedd y dafarn wedi bod yn llwyddiant yn y gymuned hyd yma, “do” oedd ateb pendant Mr Gruffydd.

Wrth ymateb i gwestiynau ynghylch pam na chafodd y gymuned ei hymgynghori cyn y penderfyniad, dywedodd Menter Y Ring Cyf fod y cytundeb tenantiaeth yn “gontract cyfreithiol” rhwng y fenter a’r tenant.

Ychwanegodd y pwyllgor fod yn rhaid trin penderfyniadau cytundebol “yn sensitif, yn gyfrinachol, ac yn unol â gofynion cyfreithiol”.

Cyn i’r gymuned brynu’r brydles, roedd aelodau o’r fenter wedi dweud wrth Newyddion S4C mai prynu’r Ring fel cymuned oedd “yr unig ffordd o sicrhau dyfodol y dafarn”, a’i chadw ar agor mewn “cymuned wledig, fechan”.

Roedd y fenter hefyd wedi dweud mai’r gobaith oedd datblygu’r dafarn fel lle i gynnal digwyddiadau cymunedol, gan gynnwys gigiau, nosweithiau barddoni a sesiynau crefft.