Image
Sir Gâr: Disgyblion anghenion arbennig yn creu hanes gyda thaith rafftio 'fythgofiadwy'
Mae criw o ddisgyblion o ysgol anghenion arbennig yn Sir Gâr wedi torri tir newydd drwy gwblhau taith rafftio "fythgofiadwy" yn yr Alban.
Fe aeth y grŵp o wyth o Ysgol Heol Goffa, Llanelli, gyda staff ar alldaith bedwar diwrnod i lawr afon Tay ym mis Mehefin fel rhan o gynllun Rhaglen Aur Gwobr Dug Caeredin.
Credir mai dyma’r tro cyntaf i ysgol arbennig o Gymru gwblhau her o’r fath.
Bu'n rhaid i'r criw rafftio am 30 cilomedr ar yr afon mewn amgylchiadau amrywiol, gan gynnwys dŵr byrlymus. Un o uchafbwyntiau’r daith, meddai’r disgyblion, oedd gweld afancod gwyllt yn nofio wrth ochr y cwch a gwiwerod coch yn y coed.
Dywedodd yr athro mewn gofal, Peter Welton, fod teithiau fel hyn yn ehangu profiadau a sgiliau’r disgyblion yn eithriadol.
“Mae'r disgyblion wedi bod yn gweithio'n frwdfrydig ar eu medrau gwasanaethu, gwirfoddoli a gweithgareddau corfforol trwy amrywiaeth eang o gyfleoedd yn yr ysgol," meddai.
"Mae'r rhain wedi cynnwys profiad gwaith, gweithgareddau cymunedol, coginio, pêl-droed, rygbi a sgïo. Mae hyn i gyd yn galluogi’r disgyblion i ddatblygu annibyniaeth, gwydnwch, gwaith tîm ac hyder mewn sefyllfaoedd go iawn."
Ychwanegodd bod yr ysgol yn edrych i gynnig mwy o gyfleon tebyg i'w disgyblion o hyn ymlaen.
"Roedd y profiad yn yr Alban yn cynnwys yr alldaith rafftio gyntaf erioed o'i bath, rhywbeth sy'n arwain y maes ac yn garreg filltir bwysig i'r rhaglen," meddai.
"Ein nod nawr yw adeiladu ar y llwyddiannau hyn trwy gynnig teithiau alldaith Efydd ac Arian y flwyddyn nesaf, gan barhau i ehangu cyfleoedd a chodi dyheadau'r holl ddisgyblion."
Image
Bythgofiadwy
Arweiniwyd y daith gan arbenigwyr o Llandysul Paddlers, canolfan gweithgareddau awyr agored yn y de-orllewin.
"Ychydig ddyddiau bythgofiadwy ar Afon Tay yn yr Alban, yn cefnogi disgyblion a staff anhygoel Ysgol Heol Goffa ar eu taith Gwobr Dug Caeredin," meddai Llandysul Paddlers.
"Mae wedi bod yn fraint gweithio ochr yn ochr ag Ysgol Heol Goffa ers nifer o flynyddoedd, ac ar ôl pob taith rydym yn meddwl sut y gallai'r nesaf fod hyd yn oed yn well. Ond rhywsut, maen nhw bob amser yn llwyddo i wneud hynny.
"Nid taith yn unig oedd hon – antur oedd hi, yn llawn penderfyniad, gwydnwch, chwerthin, gwaith tîm ac eiliadau a fydd yn aros gyda phawb a gymerodd ran am flynyddoedd i ddod.
"Fe wnaeth y disgyblion ein hatgoffa ni pam fod Heol Goffa yn ysgol mor rhyfeddol. Roedd eu hagwedd, eu hysbryd a'u parodrwydd i wynebu pob her yn wirioneddol ysbrydoledig. Mae treulio amser gyda'r grŵp hwn yn fraint bob tro.
"Mae rhai teithiau'n gofiadwy, ond roedd hon yn un fythgofiadwy."
