Mae Donald Trump wedi dweud y byddai yn "wael iawn i ddyfodol Nato" os nad yw cynghreiriaid yn llwyddo i ddiogelu'r culfor Hormuz.

Mae Iran wedi cau'r culfor yn sgil y rhyfel rhwng y wlad ac America a Israel. Culfor Hormuz yw un o brif lwybrau masnach strategol y byd ac mae'n hanfodol i ddosbarthu olew.

Mewn cyfweliad gyda'r Financial Times mae arlywydd America wedi dweud ei fod yn disgwyl i Tsieina helpu ac wedi bygwth peidio cwrdd ag arweinydd y wlad mewn uwch gynhadledd os na fyddan nhw yn gwneud.

Mae Trump wedi sôn am saith gwlad ddylai fod yn "plismona'r" culfor ond dydy o heb eu henwi. Dywedodd wrth y Financial Times bod hi "ddim ond yn briodol" i wladwriaethau sydd yn elwa o gulfor Hormuz i helpu i'w ail agor.

Ychwanegodd fod America wedi bod yn "hyfryd" gyda'i chynghreiriaid Ewropeaidd.

"Doedden ni ddim yn gorfod helpu Wcráin. Mae Wcráin filoedd o filltiroedd i ffwrdd oddi wrthom ni...Ond fe wnaethon ni helpu. Nawr fe gawn ni weld os byddan nhw yn helpu ni."

Dywedodd hefyd tra yn teithio mewn awyren y byddai o yn "cofio" os na fyddai'r gwledydd yn ei helpu.