Mae Prif Weinidog newydd Cymru, Rhun ap Iorwerth wedi cyhoeddi pa ASau Plaid Cymru fydd yn aelodau o'i gabinet cyntaf.

Daw hyn ar ôl iddo gael ei gadarnhau yn swyddogol yn Brif Weinidog newydd Cymru yn y Senedd ym Mae Caerdydd ddydd Mawrth.

Dyma restr aelodau ei gabinet:

• Prif Weinidog – Rhun ap Iorwerth
• Dirprwy Brif Weinidog a Gweinidog y Cabinet dros Gyfiawnder Cymdeithasol a Chydraddoldeb – Sioned Williams
• Gweinidog Cabinet dros Gyllid – Elin Jones
• Trefnydd, Prif Chwip a Gweinidog y Cabinet dros Ddiwylliant a Chwaraeon – Heledd Fychan
• Gweinidog Cabinet dros Effeithiolrwydd Llywodraeth a’r Cyfansoddiad – Dafydd Trystan Davies 
• Gweinidog Cabinet dros Iechyd a Gofal – Mabon ap Gwynfor 
• Gweinidog Cabinet dros Fenter, Cysylltedd ac Ynni – Adam Price 
• Gweinidog Cabinet dros Addysg a’r Gymraeg – Anna Brychan
• Gweinidog Cabinet dros Wydnwch Gwledig a Chynaliadwyedd – Llŷr Gruffydd
• Gweinidog Cabinet dros Lywodraeth Leol, Tai a Chynllunio – Siân Gwenllian
• Dirprwy Weinidog dros Iechyd Cyhoeddus ac Ataliol – Nerys Evans
• Dirprwy Weinidog dros Ofal Cymdeithasol, Iechyd Meddwl ac Iechyd Menywod – Delyth Jewell 
• Dirprwy Weinidog dros Drafnidiaeth – Mark Hooper
• Dirprwy Weinidog dros Sgiliau ac Addysg Drydyddol – Cefin Campbell
• Darpar Gwnsler Cyffredinol – Elfyn Llwyd

Dywedodd y Prif Weinidog ei fod yn "hyderus y bydd y Cabinet hwn yn dod ag egni newydd, syniadau newydd a chyfeiriad newydd i'r ffordd mae ein cenedl yn cael ei harwain".

“Mae fy llywodraeth yn un unedig, llawn doniau a phrofiad sy’n barod i wasanaethu," meddai.

"Bydd yn mynd ati i gyflawni ar sail yr hyn sy’n bosibl, gan weithio fel un tîm bob dydd i wella bywydau pobl Cymru.

“Byddwn yn cael ein llywio gan ein hegwyddorion wrth inni chwilio am atebion ymarferol i'r materion sy'n wynebu cymunedau ar hyd a lled ein gwlad – a byddwn yn bwrw ati i gyflawni ein hamcanion gydag egni yn ddi-ymdroi.

"Mae ein haddewid yn syml – ad-dalu’r ymddiriedaeth y mae pobl wedi’i rhoi ynom cyn gynted ag y gallwn, gan ddod â'r genedl ynghyd. Mae cyfnod newydd o arweinyddiaeth yn dechrau heddiw.”

Fe ychwanegodd y Dirprwy Brif Weinidog Sioned Williams: “Rwy’n ei theimlo’n fraint cael fy mhenodi'n Ddirprwy Brif Weinidog gan Brif Weinidog Cymru, Rhun ap Iorwerth, ac rwy'n ymgymryd â'r rôl hon gydag ymdeimlad dwfn o bwrpas.

“Mae hon yn Llywodraeth i bawb sydd wedi ymrwymo i droi addewid yn weithredu ar unwaith i bobl Cymru, gyda phwyslais clir ar fynd i'r afael â'r heriau sy'n wynebu pob cymuned.

“Rwy'n benderfynol o weithredu ar ein blaenoriaethau o'r diwrnod cyntaf, yn enwedig o ran cyflwyno ein cynnig gofal plant a thaclo tlodi plant ar frys, fel bod pob plentyn yn cael y diogelwch a'r cyfle mae’n ei haeddu.”

Ymateb

Dywedodd arweinydd yr wrthblaid Reform UK, Dan Thomas: "Mae angen newid brys ar ein GIG, ein hysgolion a'n heconomi, ac er y gallaf anghytuno â Phlaid Cymru, mae angen iddyn nhw lwyddo.

"Byddwn yn craffu ar eu gweithredoedd ac yn gweithio i sicrhau bod eu sylw ar ein gwasanaethau cyhoeddus ac nid ar annibyniaeth Cymru."