Yn Llys y Goron Caer ddydd Mercher, plediodd Lee Harshey-Jones, 45 oed, yn euog hefyd i gyhuddiad o wyrdroi cwrs cyfiawnder ar ôl iddo ail-osod gosodiadau ffatri ei ffôn symudol i guddio tystiolaeth a chamddefnydd o rymoedd yr heddlu drwy edrych ar gofnod o gyfrifiadur yr heddlu.

 

Cafodd adroddiad cyn dedfrydu ei orchymyn ac fe fydd y ditectif gwnstabl yn cael ei ddedfrydu ar 19 Tachwedd.

 

Dywedodd y barnwr, y Cofiadur Mark Ford KC, wrth yr heddwas yn y doc: "Ni ddylai'r ffaith fy mod wedi gohirio ar gyfer adroddiad cyn dedfrydu roi awgrym i chi o'r ddedfryd debygol fydd yn cael ei gosod yn achos yr honiadau difrifol hyn."

 

Fe fydd enw Harshey-Jones yn cael ei ychwanegu i'r gorfrestr troseddwyr rhyw.

 

Cafodd ei ryddhau ar fechnïaeth amodol.

 

Dywedodd Heddlu Gogledd Cymru fod y swyddog wedi ei arestio yn dilyn honiad ar 11 Mehefin yn ardal Bae Colwyn.

 

Mae wedi ei wahardd o'i swydd ers hynny.

 

Roedd Harshey-Jones yn brif ymchwilydd yn achos llofruddiaeth y bachgen dyflwydd oed Ethan Ives-Griffiths gan ei nain a'i daid Michael and Kerry Ives yn Sir y Fflint.

 

Mae hefyd wedi rhoi tystiolaeth mewn achosion eraill o lofruddiaeth ar ran yr heddlu.

 

Nid oedd Heddlu Gogledd Cymru am wneud sylw ar y mater am resymau cyfreithiol.