Mae dau berson wedi cael eu harestio ar amheuaeth o ddwyn cannoedd o gardiau rhodd ('gift cards') wedi i'r heddlu stopio car ar yr A55 yn Sir Conwy ddydd Sadwrn.

Fe welodd swyddogion o Uned Plismona'r Ffyrdd gar Toyota Yaris ger Llanddulas, a gofyn i'r gyrrwr eu dilyn.

Fe wnaeth y gyrrwr ddilyn car yr heddlu i ddechrau, ond trodd yn ôl ar yr A55 cyn stopio er mwyn i'r teithiwr gamu allan.

Rhedodd hwnnw i ffwrdd gan geisio dianc ac fe gafodd y car ei stopio eto.

Daeth yr heddlu i wybod fod y car yn gysylltiedig ag achos honedig o dwyll cardiau rhodd, lle roedd y bobl yn y cerbyd wedi dwyn cardiau o siopau yn yr ardal leol.

Wrth chwilio'r cerbyd, cafwyd hyd i nifer mawr o gardiau rhodd mewn dau fag siopa â leinin ffoil ynddynt.

Cafodd y gyrrwr a'r teithiwr eu harestio gyda'r ddau yn cael eu cadw yn y ddalfa.

Y gred yw bod y cardiau rhodd yn werth miloedd o bunnoedd petai nhw wedi cael eu defnyddio.

Llun: Uned Plismona'r Ffyrdd, HGC