Mae Andy Burnham wedi trafod datganoli mwy o bwerau i Gymru a’r Alban, gan ddweud ei fod am sicrhau nad yw unrhyw wlad yn cael ei "gadael ar ôl".

Fe wnaeth Prif Weinidog y DU gyfarfod Prif Weinidog Cymru, Rhun ap Iorwerth, a Phrif Weinidog yr Alban, John Swinney, ddydd Gwener i drafod rhoi mwy o bwerau i wledydd datganoledig i reoli cymorth cyflogaeth, ac arian ar gyfer ail-ddiwydiannu.

Roedd Rhun ap Iorwerth a John Swinney eisiau trafodaeth ehangach am annibyniaeth, ond mae Mr Burnham wedi diystyru cynnal refferendwm ar y mater.

Wrth siarad ar ôl cyfarfod cyntaf Cyngor Economaidd Cenedlaethol y gwledydd yn Glasgow ddydd Gwener, pwysleisiodd Brif Weinidog y DU gynlluniau i ddatganoli pwerau ar lefel ranbarthol. 

Dywedodd ei fod am sicrhau nad oedd unrhyw wlad yn cael ei "gadael ar ôl".

"Mae’n hynod bwysig ein bod ni i gyd yn symud ymlaen ar yr un cyflymder gyda’n gilydd, ac ni fyddaf yn caniatáu i unrhyw beth ohirio hynny," meddai.

"Does dim modd aros am dwf. Mae angen i bobl weld gwelliannau o ran cyflogaeth ac mewn safonau byw ym mhob rhan o’r Deyrnas Unedig."

Cafodd Gogledd Iwerddon ei chynrychioli gan swyddogion yn y cyfarfod wrth i ffrae chwerw achosi rhwygiadau yn y llywodraeth yn Belffast.

Image

Pan ofynnwyd iddo a oedd wedi cynnig pwerau ychwanegol i'r gwledydd datganoledig, dywedodd Mr Burnham: "Cawsom drafodaeth dda heddiw ar ddau faes.

"Un yn ymwneud ag ail-ddiwydiannu, a’r cynnig i ddatganoli mwy o gyllid ar gyfer arloesi i’r lefel ranbarthol.

"Y nod yw creu’r strwythurau hynny ar lefel ranbarthol, a mater i’r Alban a Chymru yw penderfynu sut olwg fydd ar y strwythurau hynny yn y ddwy wlad.

"Nid fy lle i yw gorfodi unrhyw beth na cheisio ymyrryd. Ond unwaith y bydd trefn ar waith y gall Llywodraeth yr Alban ei chefnogi, gall Llywodraeth y DU ei chefnogi hefyd, gyda’r ddwy lywodraeth yn dod at ei gilydd i gydweithio. 

"Ac yng nghyd-destun ail-ddiwydiannu, mae hynny’n golygu datganoli mwy o gyllid ar gyfer arloesi."

Ychwanegodd: "Yn ail, cawsom drafodaeth am gymorth cyflogaeth, ac yn enwedig pobl ifanc. 

"Mae gormod o bobl ifanc yn ddi-waith yma yn yr Alban, yng Nghymru ac yn Lloegr hefyd."

Dywedodd Mr Burnham y byddai’r Llywodraeth yn ystyried "trefniadau ar gyfer datganoli rhagor o gyfrifoldeb dros gymorth cyflogaeth, yn enwedig i bobl ifanc yn yr Alban a Chymru" yn dilyn y cyfarfod.

Mae Prif Weinidog y DU wedi rhoi datganoli wrth wraidd ei agenda bolisi ers iddo ddod i Rif 10 yr haf hwn.

Mae ei weledigaeth ar gyfer datganoli pellach ar lefel genedlaethol wedi bod yn llai eglur, ond mae Mr Burnham wedi dweud y bydd yn gwrando ar alwadau'r gwledydd datganoledig am ragor o bwerau.

Yn dilyn y cyfarfod, dywedodd Rhun ap Iorwerth: "Roeddwn yn falch o gyfarfod â’r Prif Weinidog yn Glasgow heddiw, lle pwysleisiais unwaith eto’r angen i Gymru a Llywodraeth Cymru gael yr offer angenrheidiol i wasanaethu ein cymunedau’n well.

"Fe wnes i ailadrodd hefyd mai mater i’r Senedd, a’r Senedd yn unig, yw unrhyw ddatganoli pellach o fewn Cymru.

"Roedd consensws calonogol bod angen diwygio, ar frys, y pwerau cyllidol a benthyca sydd ers cyhyd wedi rhoi Cymru dan anfantais o’i chymharu â chenhedloedd eraill y DU. Rwy’n croesawu sylwadau’r Prif Weinidog fod hyn bellach yn fater o sut a phryd, yn hytrach nag a ddylid gwneud hynny."