Mae cyn-arweinydd ieuenctid a wnaeth gam-drin dau fachgen yn rhywiol wedi cael ei ddedfrydu i 15 mlynedd dan glo.

Fe gafodd Paul Vaughan, 75 oed, ei garcharu yn Llys y Goron Caernarfon ddydd Mercher.

Bydd y ddedfryd yn rhedeg law yn llaw â dedfryd o ddeng mlynedd a hanner y mae Paul Vaughan yn ei dreulio dan glo ar hyn o bryd.

Clywodd y llys bod Mr Vaughan wedi cam-drin y bechgyn mwy na 40 o flynyddoedd yn ôl yng nghlwb rhwyfo'r Bala, mewn pabell yng nghysgod mynydd Tryfan ac yn ei gartref a'i gar.

Wrth siarad yn y llys, dywedodd un o'r dioddefwyr bod y cyfnod yna o'i fywyd “erioed wedi ei adael.”

Dywedodd y barnwr, Nicola Jones, wrth y dioddefwr ei fod yn “rhywbeth dewr iawn i'w wneud” wrth gyfeirio ato yn siarad am yr hyn a ddigwyddodd iddo.

"Mae'n dorcalonnus meddwl am yr effaith mae gweithredoedd y dyn hwn wedi eu cael arnot ti. Rwyt ti'n ddyn gwell nag ef."

Fe wnaeth Vaughan gyfaddef i 15 o droseddau.

Dywedodd Patrick Geddes a oedd yn cynrychioli Mr Vaughan, sydd yn dioddef o effeithiau cynnar dementia, y byddai'n 84 oed pan fydd ei gyfnod presennol yn y carchar yn dod i ben.

Fe ddywedodd y barnwr bod Vaughan wedi cyflawni gweithredoedd “ffiaidd” a'i fod yn “ysglyfaethu ar fechgyn ifanc er mwyn ei bleser rhywiol ei hun.”

Ychwanegodd ei fod yn “annhebygol” y bydd Vaughan yn gadael y carchar cyn iddo farw.