Mae Prif Weithredwr cwmni sy'n darparu gwasanaeth masnachu olew ar gyfer systemau gwresogi domestig, wedi dweud wrth Newyddion S4C bod y diwydiant yn wynebu "heriau digynsail" yn sgil yr argyfwng yn y Dwyrain Canol.

Roedd Tim Buckman, sy'n brif weithredwr ar gwmni Boilerjuice, yn ymateb i bryderon a godwyd gan gwsmeriaid yng ngorllewin Cymru ar ôl i archebion olew gael eu canslo yn ddisymwth gan y cwmni.

Mae pris olew gwresogi wedi cynyddu o 60 ceiniog y litr i dros £1.30 y litr ers dechrau'r rhyfel gan America ac Israel yn erbyn Iran.

Clywodd Newyddion S4C gan Barrie Smith o Langwm yn Sir Benfro, oedd wedi gwneud archeb am olew

"Ar y dydd Gwener, cyn y rhyfel, fe wnes i archeb drwy wefan Boilerjuice am 500 litr o olew," meddai.

"Fe ges i gadarnhad ac fe wnes i daliad am yr olew. Fe ges i e-bost o gadarnhad ar y dydd Llun, oedd yn dweud y byddai'r olew yn dod ddydd Iau diwethaf. Ar y dydd Iau, fe dderbyniais i e-bost yn dweud bod yr archeb wedi ei chanslo."

Mae Newyddion S4C wedi derbyn nifer o negeseuon gan gwsmeriaid yng ngorllewin Cymru sydd wedi cael yr un profiad â Mr Smith.

Cwmni DJ Davies o Rydaman oedd fod i ddosbarthu'r olew ar ran Boilerjuice, ond dywedodd DJ Davies eu bod nhw yn "gweld problemau gyda chyflenwadau o'r burfa olew."

"Ni'n cael casglu llai a llai olew o'r burfa, ac mae hyn yn effeithio ar ein gallu i weithredu â chwmnïau eraill. Mae hyn wedi golygu ein bod ni wedi gorfod canslo archebion a wnaed drwy wefan Boilerjuice, am ein bod ni yn cael cosb ariannol os nad yw archebion yn cael eu cwblhau o fewn terfyn amser penodol.

"Rydym yn annog cwsmeriaid i beidio â phrynu mewn panig."

Image

Mae Mr Smith yn dweud ei fod e'n flin gyda chwmni Boilerjuice am beidio â rhoi gwybod iddo yn gynt am y problemau gyda dosbarthwyr lleol, ac mae wedi gwneud cwyn swyddogol am yr oedi cyn rhoi gwybod iddo nad oedd modd cwblhau’r archeb.

Mae’n dweud ei fod e wedi clywed gan nifer fawr o gwsmeriaid sydd wedi cael eu siomi.

"Mae angen mwy o reolaeth yn y diwydiant. Mae pobl yn ddibynnol ar olew gwresogi.

"Diolch byth bod y gwanwyn a'r haf ar ein gwarthau. Rwy'n arswydo wrth feddwl beth fyddai'r sefyllfa yn yr Hydref. Rwy'n meddwl taw'r cymorth mwyaf gall bobl roi nawr yw i beidio â phrynu mewn panig."

Dywedodd Tim Buckman, Prif Weithredwr Boilerjuice, bod y wefan yn gweithredu fel "marchnad" ar-lein sydd yn cysylltu cwmnïau lleol gyda chwsmeriaid. Doedd e ddim yn fodlon ymateb i gwynion unigol.

"Mae archebion yn cael eu gwneud drwy blatfform Boilerjuice, a'r dosbarthydd lleol sydd yn gyfrifol am osod y pris a chadarnhau amseroedd dosbarthu," meddai.

"Mae'r mwyafrif o archebion yn cael eu cwblhau yn ôl yr arfer, ond mae yna beth oedi a phroblemau yn sgil yr amodau presennol ar y farchnad ryngwladol, ac rydym yn gwneud ein gorau i geisio cefnogi cwsmeriaid a chyflenwyr ar yr adeg anodd yma.

"Mae'r rhain yn heriau digynsail ac yn amser heriol iawn i gwsmeriaid a chyflenwyr. Mae prisiau olew yn amrywio 20% bob dydd, ac mae'r galw hefyd yn uchel."