Mae ysgol yn Llandudno wedi rhoi teyrnged i “athro gwych” yn dilyn ei farwolaeth.

Roedd Richard Whitham wedi bod yn dysgu daearyddiaeth a dyniaethau yn Ysgol John Bright ers 2005.

Mewn datganiad ar y cyfryngau cymdeithasol, dywedodd yr ysgol:  “Fel cymuned ysgol, rydym yn galaru am farwolaeth gynamserol Mr Richard Whitham yn gynharach yr wythnos hon.

“Roedd Mr Whitham wedi gweithio yn Ysgol John Bright ers 2005, gan dreulio ei yrfa addysgu gyfan yn gwasanaethu cymuned Llandudno.

“Roedd Mr Whitham yn eiriolwr dros bob disgybl, yn enwedig y rhai oedd yn cael trafferth yn yr ysgol neu’n ei chael hi’n anodd dysgu.

“Roedd ei arweinyddiaeth o’r cwrs Dyniaethau a chyrsiau tebyg dros y blynyddoedd yn rhagorol, gan sicrhau bod cenedlaethau o bobl ifanc yn gadael Ysgol John Bright gyda chymwysterau a oedd yn adlewyrchu eu galluoedd a’u diddordebau.”

Roedd Mr Whitham hefyd wedi chwarae rôl bwysig mewn cynyrchiadau drama’r ysgol.

Ychwanegodd yr ysgol: “Mae sioeau Ysgol John Bright yn chwedlonol; ni ​​fyddent yr un fath heb i Mr Whitham arwain y tîm cefn llwyfan a’r adran propiau. 

“Roedd hyn hefyd yn adlewyrchiad gwirioneddol o gymeriad Mr Whitham – nid oedd byth eisiau bod yng nghanol y llwyfan, ond yn hytrach eisiau gwasanaethu a helpu cymaint ag y gallai, i ffwrdd o’r sylw.

“Fel ysgol, rydym wedi colli athro gwych; fel staff, rydym wedi colli ffrind a chydweithiwr annwyl. 

“Estynnwn ein cydymdeimlad dwysaf at Mrs Whitham, eu merch Sarah a theulu ehangach Mr Whitham ar yr adeg hon.”