Mae paratoadau carfan Cymru ar gyfer Pencampwriaeth y Cenhedloedd wedi cael eu heffeithio yn sgil anghydfod gydag Undeb Rygbi Cymru dros ffioedd gemau. 

Fe fydd tîm Steve Tandy yn chwarae yn erbyn Ffiji, yr Ariannin a De Affrica ond mae'r paratoadau wedi cael eu heffeithio gan faterion oddi ar y cae a gafodd eu datrys ddydd Mercher. 

Fe gafodd trafodaethau eu cynnal rhwng yr undeb a Chymdeithas Chwaraewyr Rygbi Cymru am "delerau cyflogaeth" ac fe ddaethant i gytundeb yn hwyr brynhawn Mercher i sicrhau y bydd gêm Ffiji yn Stadiwm Dinas Caerdydd yn mynd yn ei blaen.

Roedd Cymru i fod i gael cynhadledd i'r wasg ddydd Mercher gyda dau chwaraewr ar drothwy'r gêm yn Stadiwm Dinas Caerdydd ddydd Sadwrn. 

Wedi oedi o dros awr, fe benderfynodd y garfan i beidio mynychu'r gynhadledd yn sgil yr anghydfod gyda'r Undeb.

Fe gafodd trafodaethau pellach eu cynnal yn ddiweddarach cyn cyrraedd cytundeb ychydig cyn 17:00 gyda chwaraewyr yn cael eu gweld yn gadael y cyfarfod. 

Mewn datganiad ar y cyd, fe ddywedodd Undeb Rygbi Cymru a Chymdeithas Chwaraewyr Rygbi Cymru: "Fe gafodd mynediad i'r cyfryngau ei ohirio heddiw yn sgil trafodaethau parhaus rhwng cynrychiolwyr URC a Chymdeithas Chwaraewyr Rygbi Cymru ynghylch termau cyflogaeth ar gyfer y gystadleuaeth newydd sef Pencampwriaeth y Cenhedloedd.

"Mae'r trafodaethau hyn bellach wedi dod i ben gyda phob sefydliad wedi eu boddhau. 

"Nid yw paratoadau ar gyfer y gêm yn erbyn Ffiji yn Stadiwm Dinas Caerdydd wedi cael eu heffeithio."

Daw hyn wedi sawl problem oddi ar y cae yn y blynyddoedd diweddar i rygbi yng Nghymru. 

Mae cyfnod Tandy wrth y llyw hefyd wedi cael ei effeithio gan yr ansicrwydd gan Undeb Rygbi Cymru i leihau'r nifer o dimau proffesiynol o bedwar i dri. 

Mae disgwyl i Tandy enwi ei dîm i wynebu Ffiji fore Iau. 

Bydd Cymru hefyd yn wynebu'r Ariannin a De Affrica oddi cartref.