Adroddiadau fod Vitor Matos ar fin gadael Abertawe

Vitor Matos

Mae adroddiadau fod rheolwr Clwb Pêl-droed Abertawe, Vitor Matos, ar fin gadael y clwb i ymuno â chlwb Strasbourg yn Uwch Gynghrair Ffrainc.

Yn ôl yr arbenigwr ar drosglwyddiadau pêl-droed Fabrizio Romano, mae Matos wedi cytuno symud i'r clwb o Ligue 1, sydd o dan yr un berchnogaeth â Chelsea.

Mae llwyddiant Matos wedi denu diddordeb y clwb yn Ffrainc, sydd wedi cysylltu ag Abertawe ynglŷn â'i benodi'n brif hyfforddwr newydd.

Cafodd Matos ei benodi'n brif hyfforddwr Abertawe ym mis Tachwedd 2025, yn dilyn diswyddiad Alan Sheehan.

Roedd yr Elyrch yn yr 20fed safle ym Mhencampwriaeth Lloegr pan gyrhaeddodd y rheolwr 37 oed, gyda'r clwb yn wynebu brwydr i osgoi disgyn o'r gynghrair.

Llwyddodd Matos i drawsnewid perfformiadau'r tîm, gan ennill 14 o'i 30 gêm gynghrair yn ystod gweddill y tymor.

Gorffennodd Abertawe dymor 2025-26 yn yr 11eg safle gyda 64 pwynt, ar ôl ennill 3-1 yn erbyn Charlton Athletic ar ddiwrnod olaf y tymor.

Roedd gan Abertawe y pedwaredd record gartref gorau yn y Bencampwriaeth ers penodi Matos, gan ennill 30 pwynt o 15 gêm.

Y tymor hwn mae Matos wedi cyflwyno arddull chwarae ymosodol, gan roi pwyslais ar feddiant o'r bêl a rhoi pwysau ar y gwrthwynebwyr.

Mae'r Elyrch wedi bod ar frig tabl y Bencampwriaeth am gyfnodau hir yn ystod mis Medi a mis Hydref.

Er mai dim ond un o'u pum gêm ddiwethaf maen nhw wedi'i hennill, mae Abertawe bellach yn y chweched safle, sef un o'r safleoedd sy'n sicrhau lle yn y gemau ail gyfle am ddyrchafiad i Uwch Gynghrair Lloegr.

Newyddion diweddaraf

Mae'r wefan hon yn defnyddio cwcis i sicrhau eich bod chi'n cael y profiad gorau ar ein gwefan.