Mae CPD Abertawe "eisiau ceisio dangos mai nhw yw'r tîm gorau yng Nghymru" pan fyddan nhw'n wynebu Wrecsam nos Sadwrn, meddai golwr y clwb Laurence Vigouroux.

Bydd Wrecsam yn teithio i Stadiwm Swansea.com i wynebu'r Elyrch am 20:00 nos Sadwrn.

Bydd y ddau dîm yn dechrau'r gêm ar ôl ennill eu gemau yn ystod yr wythnos, gydag Abertawe wedi ennill 2-0 yn erbyn Watford a Wrecsam wedi sicrhau buddugoliaeth o 3-0 oddi cartref yn erbyn Millwall.

Yr Elyrch sydd ar frig y gynghrair ar hyn o bryd ar ôl ennill tair a chael un gêm gyfartal, tra bod y Dreigiau yn yr 11eg safle.

Y llynedd, enillodd Abertawe y gêm hon yn SA1, a Wrecsam oedd yn fuddugol ar Stok Cae Ras.

Wrth siarad cyn y gêm nos Sadwrn, dywedodd golwr Abertawe, Laurence Vigouroux, fod yr Elyrch "eisiau dangos mai nhw yw'r tîm gorau yng Nghymru".

"Wrth gwrs, y prif gêm ddarbi yw Caerdydd - dyna'r gêm mae pawb yn llygadu pan mae'r gemau yn cael eu cyhoeddi.

"Dros y blynyddoedd diwethaf, mae'r ornest gyda Wrecsam wedi dechrau datblygu. Mae'r awyrgylch yng ngêm Caerdydd yn wallgof, mae hon ychydig yn llai ond mae hi yn dal i fod yn gêm fawr.

"Mae'n gogledd yn erbyn y de, ac rydym yn edrych ymlaen at geisio dangos i bawb mai ni yw'r tîm gorau yng Nghymru."

Image

Enillodd Wrecsam 3-0 yn erbyn Millwall nos Fercher, eu buddugoliaeth gyntaf yn y gynghrair eleni.

Ar ddiwrnod olaf y ffenestr drosglwyddo, arwyddodd Joe Worrall a Callum O'Hare i'r clwb.

Hyder

Mae rheolwr y Dreigiau, Phil Parkinson, yn credu bod ei garfan yn hyderus ar ôl eu buddugoliaeth nos Fercher.

"Rydym yn edrych fel tîm mwy medrus y tro hwn. Mae'r chwaraewyr wedi dod i'r arfer â lefel y Bencampwriaeth ac wrth gwrs, rydym wedi ychwanegu chwaraewyr o ansawdd i'r garfan," meddai.

"Bydd cefnogwyr Abertawe yn teimlo'n dda ar ôl eu dechrau da i'r tymor, ond rydym yn gwybod beth sy'n rhaid i ni ei wneud.

"Cafodd y chwaraewyr gyfarfod gwych fore Gwener, a nawr ein dyletswydd ni yw cyflawni'r hyn rydym wedi ei drafod a gweithio arno ar y cae ymarfer.

"Yn amlwg maen nhw'n hyderus, ond rydym ni'n hyderus hefyd ar ôl y fuddugoliaeth ym Millwall a byddwn ni'n cymryd y perfformiad hwnnw i'r gêm hon."

'Pob tîm yn wahanol'

Mae Laurence Vigouroux yn cydnabod y bydd Wrecsam yn her wahanol i'r clybiau maen nhw wedi'u hwynebu hyd yma.

"Rydym yn gwybod beth maen nhw'n gallu ei wneud," meddai, gan gyfeirio at gryfder corfforol a gallu Wrecsam o giciau gosod.

"Os yw hi'n agored, mae gennym y cyfle i wneud yr hyn rydym wedi ei ddangos yn y Bencampwriaeth hyd yma.

"Mae pob gêm yn wahanol, mae pob tîm yn teithio i fan hyn gyda chynlluniau gwahanol ac mae rhaid i ni ddod o hyd i ffordd o rwystro hynny."