Y DU yn gosod sancsiynau ar gwmnïau sy’n adeiladu aneddiadau yn y Lan Orllewinol
Mae’r DU wedi gosod sancsiynau ar gwmnïau sy’n adeiladu aneddiadau yn y Lan Orllewinol, ac ar grŵp sy’n rhwystro cymorth i Gaza.
Daw’r sancsiynau ar ôl addewid gan yr Ysgrifennydd Tramor, Ed Miliband, ym mis Medi y byddai’n ymateb i dwf aneddiadau Israel yn y Lan Orllewinol, sef tiriogaeth o dan feddiannaeth filwrol y wlad.
Mae Mr Miliband wedi dadlau y byddai cynlluniau ar gyfer datblygiad E1 yn y Lan Orllewinol yn gwneud datrysiad dwy wladwriaeth yn amhosibl yn ymarferol.
Mae’r sancsiynau newydd yn targedu wyth cwmni sy’n ymwneud ag adeiladu a datblygu eiddo ac sy’n rhan o’r gwaith o ehangu’r aneddiadau.
Bydd y mesurau’n cyfyngu ar eu mynediad at gyllid a’u gallu i gefnogi rhagor o adeiladu yn y Lan Orllewinol, yn ôl y Swyddfa Dramor.
Mae’r cwmnïau’n cynnwys Har Hevron Development Company Ltd, Hemdat Shomron Ltd a SAG (Velvel) Construction and Development Ltd.
Mae’r sancsiynau hefyd wedi taro Tzav 9, mudiad ymgyrchu yn Israel sydd wedi atal cymorth dyngarol rhag mynd i mewn i Gaza.
Daw’r cyhoeddiad ychydig ddyddiau cyn i’r broses o adolygu tendrau ar gyfer adeiladu tai i Israeliaid yn natblygiad E1 ddechrau.
Mae'r rhai sy'n feirniadol o'r datblygiad yn dweud y gallai ei gwneud yn anoddach creu gwladwriaeth annibynnol i Balesteiniaid, gan wahanu rhannau o’r Lan Orllewinol oddi wrth Dwyrain Jerwsalem.
'Hyrwyddo heddwch'
Dywedodd Mr Miliband: “Mae diogelu’r datrysiad dwy wladwriaeth yn egwyddor ganolog i ddull y Llywodraeth hon.
“Dyna pam mae fy neges ynghylch E1 yn glir: peidiwch â chyflwyno cais, peidiwch ag adeiladu, a pheidiwch ag elwa o ddinistrio’r datrysiad dwy wladwriaeth.
“Ac ni fyddwn yn sefyll o’r neilltu tra bo’r rhai sy’n rhwystro cymorth y mae dirfawr ei angen yn gwaethygu dioddefaint annioddefol sifiliaid yn Gaza.
“Mae’r sefyllfa bresennol yn y Lan Orllewinol a Gaza yn annerbyniol.
“Rydym wedi ymrwymo i weithio’n adeiladol gyda llywodraeth newydd yn Israel ac Awdurdod Palesteina er mwyn hyrwyddo heddwch a diogelwch parhaol i Israeliaid a Phalesteiniaid.”
Ar 8 Medi, cyhoeddodd Mr Miliband y byddai mewnforio nwyddau o aneddiadau anghyfreithlon yn Nhiriogaethau Palesteinaidd sydd wedi'i meddiannu yn cael ei wahardd, ynghyd â gosod sancsiynau ar unigolion a chwmnïau sy’n darparu gwasanaethau i’r ymsefydlwyr.
Dywedodd yr Ysgrifennydd Tramor fod Llywodraeth Prydain o’r farn bod y feddiannaeth gyfan yn anghyfreithlon.
Roedd hynny’n mynd ymhellach na’r safbwynt blaenorol, a oedd yn disgrifio’r aneddiadau eu hunain yn unig fel rhai anghyfreithlon.
Dywedodd fod mwy o aneddiadau wedi cael eu cymeradwyo yn ystod pedair blynedd llywodraeth Benjamin Netanyahu nag yn ystod yr 20 mlynedd flaenorol, a bod terfysgaeth gan ymsefydlwyr yn y Lan Orllewinol yn “rhemp”.
Mae newid polisi’r DU o dan y Prif Weinidog Andy Burnham wedi ennyn ymateb chwyrn gan weinyddiaeth Donald Trump yn yr Unol Daleithiau a llywodraeth Israel dan arweiniad Benjamin Netanyahu.
Llun: Reuters