Clwb Rygbi RGC yn cofio chwaraewr ifanc yn eu gêm gyntaf ers ei farwolaeth

01/11/2026
Cofio Jack Davies

Cafodd blodau eu gosod cyn gêm Clwb Rygbi Gogledd Cymru ddydd Sadwrn er cof am chwaraewr ifanc a fu farw.

Bu farw Jack Cameron Wynne Davies, 24 oed, a oedd yn chwarae i Gaernarfon a Rygbi Gogledd Cymru, yn gynharach y mis hwn.

Roedd y dyn ifanc o Lanfairpwll ar Ynys Môn yn chwaraewr rygbi talentog ac yn athro yn Ysgol David Hughes ym Mhorthaethwy.

Ddydd Sadwrn fe chwaraeodd RGC a Chaernarfon eu gemau cyntaf ers ei farwolaeth.

Cafodd blodau a chrys eu gosod wrth ochr y cae cyn gêm RGC er mwyn cofio amdano.

Image
Cafodd crys a blodau eu gosod wrth ochr y cae cyn y gêm. Llun: RGC
Cafodd crys a blodau eu gosod wrth ochr y cae cyn y gêm. Llun: RGC

Mewn neges ar y cyfryngau cymdeithasol, dywedodd RGC: "Roeddem wedi dod at ein gilydd i gofio Jack."

Enillodd RGC eu gêm yn erbyn Pont-y-pŵl 49-19, tra enillodd tîm cyntaf Caernarfon 50-17 yn erbyn Pwllheli.

Enillodd ail dîm Caernarfon 43-5 yn erbyn Bae Colwyn Athletic.

Image
Jack Cameron Wynne Davies 2
Llun: Clwb Rygbi Caernarfon

Yn gynharach yr wythnos hon, cyhoeddodd Clwb Rygbi Caernarfon y byddai'n ymddeol crys rhif pump am weddill y tymor er cof am Jack Davies.

Mewn cyhoeddiad nos Iau, dywedodd Clwb Rygbi Caernarfon: "Fel teyrnged i Jack, byddwn yn ymddeol crys rhif pump y tîm cyntaf ar gyfer gweddill y tymor.

"Roedd yn bleser gwylio Jack yn chwarae yn y rhif, a teimlwn fel tîm bod y dewis yma yn destament i’w gof."

Newyddion diweddaraf

Mae'r wefan hon yn defnyddio cwcis i sicrhau eich bod chi'n cael y profiad gorau ar ein gwefan.