Y band Topper yn ail-ffurfio ar gyfer gŵyl yn Nyffryn Nantlle mewn teyrnged i Dyfrig Evans
Fe fydd y band Topper yn ail-ffurfio i berfformio mewn gŵyl yn Nyffryn Nantlle y flwyddyn nesaf mewn teyrnged i'r diweddar Dyfrig Evans.
Bydd y band o Ben-y-groes yng Ngwynedd yn perfformio yng Ngŵyl Maes D ym mis Mai 2027.
Bu farw y cerddor a’r actor Dyfrig Evans yn 43 oed yn dilyn cyfnod o waeledd yn 2022.
Yn ystod 90au cynnar, fe ddechreuodd ganu ym mand Paladr gyda’i frawd Iwan Evans, cyn i’r band ddatblygu dan enw ‘Topper’ yn ddiweddarach.
Roedd yn gitarydd a phrif ganwr gyda’r grŵp, ac fe ddaeth i gael ei adnabod gan lawer fel Dyfrig Topper o achos llwyddiant y band.
Caneuon cofiadwy
Roedd ‘Topper’ yn un o grwpiau mwyaf poblogaidd y sîn roc am nifer o flynyddoedd, gan gyhoeddi sawl albwm ag EP oedd yn cynnwys caneuon cofiadwy fel ‘Hapus’, ‘Cwpan mewn dŵr’ a ‘Newid er mwyn newid’.
Aeth y band ar daith gyda Catatonia, cyn dirwyn i ben yn 2001. Cafodd casgliad o ganeuon ‘Topper’ eu rhyddhau dan enw ‘Y Goreuon o’r Gwaethaf’ ar label Rasal yn 2005.
Mewn neges ar y cyfryngau cymdeithasol nos Fercher, dywedodd Gŵyl Maes D: "Mi fydd band Topper yn ail ffurfio yn arbennig ar gyfer Gŵyl Maes D i dalu teyrnged i’r cerddor arbennig a thalentog Dyfrig Evans.
"Mi fydd brodyr a ffrindia Dyfrig yn dod yn nôl at ei gilydd ddegawd yn ddiweddarach i'n diddanu. Mi fydd gwestai arbennig yn cael y fraint o ganu caneuon Dyfrig gyda band Topper."
Ychwanegodd yr ŵyl: "Roedd Dyfrig yn wreiddiol o Benygroes a roedd ganddo feddwl y byd o Ddyffryn Nantlle.
"Mae dychwelyd yn ôl i wreiddiau Dyfrig gyda Topper yn gwneud ymddangosiad arbennig gyda’i gilydd yng nghae Clwb Pêl Droed Nantlle Vale am y tro cyntaf ers blynyddoedd yn hollol emosiynol ac yn gyfraniad arbennig iawn i Wŷl Maes D. "
