Mae'r Swyddfa Dywydd wedi cyhoeddi rhybuddion melyn am wyntoedd cryfion i Gymru gyfan ddydd Gwener yn sgil Storm Austen.

Bydd y rhybudd cyntaf yn dod i rym am hanner nos ac yn parhau tan 17.00, gan effeithio ar 18 o siroedd yng ngogledd, gorllewin a de Cymru.

Yn ôl y Swyddfa Dywydd, gallai gwyntoedd cryfion o’r gorllewin a’r gogledd-orllewin ddod â hyrddiau o rhwng 50 a 60 milltir yr awr.

Gallai’r hyrddiau gyrraedd 70 milltir yr awr neu fwy mewn rhai mannau arfordirol ac agored.

Bydd y tywydd garw yn symud tua’r dwyrain yn ystod y dydd, gydag ail rybudd yn dod i rym am 10.00 ac yn parhau tan 21.00.

Bydd y rhybudd hwnnw yn effeithio ar naw o siroedd yng ngogledd, dwyrain a de Cymru.

Er nad oes disgwyl i’r gwyntoedd fod mor gryf yn ardaloedd yr ail rybudd, mae posibilrwydd o wyntoedd cryfion mewn mannau mewndirol yn ystod y dydd, gyda hyrddiau o tua 45 i 55 milltir yr awr.

Dywedodd y Swyddfa Dywydd bod posibilrwydd y bydd adeiladau’n cael eu difrodi, gan gynnwys teils yn cael eu chwythu oddi ar doeau.

Gallai’r tywydd hefyd darfu ar wasanaethau trenau, bysiau, awyrennau a fferïau, gyda theithiau’n cymryd mwy o amser neu’n cael eu canslo.

Mae siawns fach y bydd rhai ffyrdd a phontydd yn cau, ac y bydd toriadau trydan a allai effeithio ar wasanaethau eraill, gan gynnwys signal ffonau symudol.

Bydd cyfnodau o law trwm hefyd yn gwneud teithio’n anoddach.

Bydd y rhybudd cyntaf yn effeithio ar y siroedd canlynol: 

• Blaenau Gwent

• Bro Morgannwg

• Caerdydd

• Caerffili

• Casnewydd

• Ceredigion

• Gwynedd

• Ynys Môn

• Merthyr Tudful

• Sir Fynwy

• Castell-nedd Port Talbot

• Sir Benfro

• Pen-y-bont ar Ogwr

• Powys

• Rhondda Cynon Taf

• Sir Gaerfyrddin

• Abertawe

• Torfaen

Bydd yr ail rybudd yn effeithio ar y siroedd canlynol: 

• Ceredigion

• Conwy

• Sir Ddinbych

• Sir y Fflint

• Gwynedd

• Ynys Môn

• Sir Fynwy

• Powys

• Wrecsam