Mae'r heddlu wedi lansio ymchwiliad yn dilyn marwolaeth dyn yng Nghaergybi yn oriau mân fore Sadwrn.

Cafodd Heddlu Gogledd Cymru alwad gan Wasanaeth Ambiwlans Cymru am 02:42 yn dilyn digwyddiad mewn fflat yn Llys Watling, Ffordd Llundain.

Er gwaethaf ymdrechion y gwasanaethau brys, cafodd y dyn ei gyhoeddi'n farw yn y fan a'r lle.

Mae dyn lleol wedi cael ei arestio mewn cysylltiad â'r digwyddiad ac mae'n parhau yn nalfa'r heddlu.

Dywedodd y Prif Dditectif Arolygydd Richard Sidney: "Rydyn ni'n deall y gallai'r digwyddiad hwn achosi pryder yn y gymuned leol, ac rydw i am dawelu meddyliau trigolion y bydd mwy o swyddogion heddlu yn yr ardal heddiw wrth iddyn nhw fynd o ddrws i ddrws a chynnal ymchwiliadau pellach."

Mae'r heddlu'n apelio ar unrhyw un sydd â gwybodaeth a allai helpu gyda'r ymchwiliad i gysylltu â nhw drwy'r gwasanaeth sgwrsio ar-lein neu drwy ffonio 101, gan ddyfynnu'r cyfeirnod 26000852942.