Mae'n cymryd dwy awr a hanner ar gyfartaledd i drosglwyddo cleifion o ambiwlansys i'r adran frys yn Ysbyty Maelor Wrecsam, yn ôl adroddiad newydd.

Mae'r amser yn sylweddol uwch na gofyniad Llywodraeth Cymru o 45 munud.

Cafodd y ffigurau eu cyhoeddi mewn adroddiad ar berfformiad yr adran damweiniau ac achosion brys a gyflwynwyd i Bwyllgor Craffu Diogelu, Cymunedau a Lles Cyngor Bwrdeistref Sirol Wrecsam.

Cafodd yr adroddiad ei gyflwyno ar y cyd gan Ysbyty Maelor Wrecsam, Bwrdd Iechyd Prifysgol Betsi Cadwaladr a Gwasanaeth Ambiwlans Cymru.

Aros am welyau

Mae tua 180 o gleifion yn mynd i adran frys Ysbyty Maelor Wrecsam bob dydd ar gyfartaledd, yn ôl yr adroddiad. Oherwydd gorlenwi, gall hyd at 60 o gleifion fod yn aros am wely ar ward ar unrhyw adeg.

Mae'r ysbyty hefyd yn methu â chyrraedd targedau cenedlaethol ar amseroedd aros. Mae'r targed pedair awr yn nodi na ddylai 95% o gleifion orfod aros mwy na phedair awr am driniaeth neu i gael eu derbyn i'r ysbyty.

Ers mis Ionawr, ychydig o dan 40% o gleifion yn Ysbyty Maelor Wrecsam sydd wedi aros pedair awr neu fwy ar gyfartaledd. Mae bron i chwarter wedi aros 12 awr neu fwy.

Yn ôl y targed cenedlaethol, ni ddylai unrhyw glaf orfod aros 12 awr am driniaeth neu i gael ei dderbyn.

Image

Cofnodion digidol

Dywedodd Gwasanaeth Ambiwlans Cymru eu bod yn gweithio i leihau amseroedd trosglwyddo cleifion ymhellach drwy ddefnyddio system cofnodion gofal cleifion electronig.

Dywedodd Emma Wood, Prif Weithredwr Gwasanaeth Ambiwlans Cymru, y byddai'r system yn helpu i gysylltu gwybodaeth rhwng y gwasanaeth ambiwlans ac ysbytai yn hytrach na bod gwybodaeth gyfrifiadurol yn gorfod cael ei hysgrifennu â llaw a'i hychwanegu at system arall.

Mae Ysbyty Maelor Wrecsam yn dweud eu bod yn parhau i weithredu camau cynnar y drefn o fabwysiadu system cofnodion digidol.

Does dim un gronfa ddata ar hyn o bryd sy'n cysylltu gwybodaeth Gwasanaeth Ambiwlans Cymru, yr ysbyty a gwasanaethau gofal cymdeithasol, sy'n golygu ei bod yn gallu bod yn anodd cael darlun cyflawn o hanes claf.

Dywedodd Ian Donnelly, Cyfarwyddwr Gweithrediadau Cymuned Iechyd Integredig y Dwyrain ym Mwrdd Iechyd Prifysgol Betsi Cadwaladr, fod system newydd o'r enw Right Patient, Right Bed yn cael ei defnyddio fel rhan o gynllun y gaeaf.

Mae'r system yn galluogi staff gofal cymdeithasol i weld pa gleifion sydd yn yr ysbyty a pha lwybr gofal maen nhw arno.

Ond dywedodd nad oes un gronfa ddata sy'n cynnwys gwybodaeth gan wasanaethau cymdeithasol awdurdodau lleol, ysbytai acíwt ac ysbytai cymunedol.

Ceisio osgoi teithiau diangen i'r ysbyty

Clywodd aelodau'r pwyllgor hefyd am fesurau sy'n cael eu defnyddio i geisio lleihau'r pwysau ar yr adran frys.

Mae cynllun 'call before convey' yn galluogi criwiau ambiwlans i siarad ag arbenigwyr clinigol o bell neu ganolfan frysbennu cyn penderfynu a oes angen mynd â chlaf i'r adran frys.

Mae uwch-ymarferwyr parafeddygol hefyd yn cael eu defnyddio i drin rhai cleifion nad oes angen ambiwlans arnyn nhw.

Dywedodd Estelle Hitchin, Cyfarwyddwr Partneriaethau ac Ymgysylltu Gwasanaeth Ambiwlans Cymru, fod gan yr ymarferwyr sgiliau ychwanegol sy'n golygu eu bod yn aml yn gallu trin cleifion yn eu cartrefi.

"Yr hyn rydyn ni'n ei weld yn aml yw eu bod nhw'n gallu trin y claf yn effeithiol yn ei gartref ei hun a'i ryddhau yno gyda'r driniaeth gywir," meddai.

Dywedodd fod hynny'n golygu nad oes angen mynd â rhai cleifion i'r ysbyty nac, mewn rhai achosion, eu cyfeirio'n ôl at eu meddyg teulu.

Fe wnaeth aelodau'r pwyllgor dderbyn yr adroddiad a chroesawu'r gwaith sy'n mynd rhagddo i wella gwasanaethau ambiwlans a'r adran frys.

Mae disgwyl i'r adroddiad nesaf gael ei gyflwyno ym mis Gorffennaf 2027.