Mae Prif Weinidog y DU, Andy Burnham, wedi dweud wrth Ganghellor yr Almaen, Friedrich Merz, ei fod eisiau "dod â'r DU yn nes at Ewrop" wrth iddo ymweld â Berlin ddydd Iau.

Dywedodd Mr Burnham fod y DU a'r Undeb Ewropeaidd yn wynebu heriau cyffredin a bod angen meddwl am y cyfleoedd economaidd a ddaw o berthynas agosach.

"Mae’r amser wedi dod i feddwl yn fwy difrifol am dwf, ac yn amlwg rydym yn gwybod y gall perthynas agosach arwain at dwf," meddai'r Prif Weinidog.

"Mae uwchgynhadledd rhwng y DU a’r Undeb Ewropeaidd i’w chynnal cyn diwedd y flwyddyn, ac rwy’n credu ei bod yn bwysig dangos bod cydweithio yn gallu arwain at dwf, yn ogystal â’n galluogi i wynebu heriau cyffredin gyda’n gilydd."

Fe aeth ymlaen i ddweud ei fod yn gobeithio y bydd y gwaith yno "yn dod â ni’n nes at ein gilydd".

"Rydym eisoes yn bartneriaid agos iawn, ond mae’r berthynas rhwng y DU a’r Almaen yn dod yn fwyfwy pwysig wrth i ni symud i’r cyfnod nesaf," meddai.

Dywedodd Mr Merz ei fod "yn bersonol yn hynod falch" bod Mr Burnham wedi ailagor y drafodaeth am berthynas Prydain â’r Undeb Ewropeaidd.

"O ochr yr Almaen, gallaf eich sicrhau y byddwn yn gwneud popeth o fewn ein gallu i ddod â’r DU yn nes at Ewrop, at gyfandir Ewrop, ac at yr Undeb Ewropeaidd," meddai Canghellor yr Almaen.

"Ac rwy’n hynod falch o’ch cael chi yma heddiw gyda’r neges glir honno o’ch ochr chi, a’r ateb clir hwnnw o’n hochr ni."