Fe fydd Georgia Evans yn ennill ei 50fed cap dros Gymru wrth i’r tîm wynebu’r Unol Daleithiau yng Nghyfres Fyd-eang WXV ddydd Sadwrn.

Bydd y gêm ym Mharc yr Arfau, Caerdydd, yn ail gêm Cymru yn y gyfres, wyth diwrnod ar ôl iddyn nhw guro De Affrica 50-19 yn yr un stadiwm.

Honno oedd buddugoliaeth gyntaf Cymru mewn gêm brawf ers 14 mis, gyda’r tîm yn sgorio wyth cais.

Mae’r prif hyfforddwr Sean Lynn wedi gwneud tri newid i’r tîm ar gyfer y gêm yn erbyn UDA, gan gynnwys un newid safle.

Bydd Evans, a wnaeth ei hymddangosiad cyntaf dros Gymru yn erbyn Sbaen yn 2019, yn dechrau yn yr ail reng ochr yn ochr â Branwen Metcalfe.

Mae Carys Cox yn dychwelyd ar ôl anaf ac yn dechrau ar yr asgell, tra bydd Alex Callender a Kate Williams yn gyd-gapteiniaid unwaith eto.

Mae’r pac a ddechreuodd yn erbyn De Affrica heb newid, gyda Maisie Davies, Kelsey Jones a Sisilia Tuipulotu yn y rheng flaen.

Fe wnaeth Tuipulotu sgorio dau gais ym muddugoliaeth Cymru dros Dde Affrica.

Tri newid i dîm Cymru

Bydd Keira Bevan yn symud o safle’r maswr i ddechrau fel mewnwr, gyda Lleucu George yn dod i mewn yn faswr.

Courtney Keight a Freya Bell fydd yn y canol, gyda Cox, Amy Williams a Lisa Neumann yn ffurfio’r tri ôl.

Bydd UDA yn dod i Gaerdydd ar ôl buddugoliaeth 40-36 dros Iwerddon yn Nulyn yn eu gêm gyntaf yn y gyfres.

Image

Dywedodd Lynn y bydd yr Americanwyr yn cyrraedd Caerdydd yn llawn hyder ar ôl y fuddugoliaeth honno, gan ddisgrifio’r tîm fel un “heini, cyflym ac athletaidd”.

Wrth sôn am garreg filltir Evans, dywedodd Lynn ei bod yn “haeddu’r clod”, gan ganmol ei chyfradd waith a’i hymrwymiad i Gymru.

Ni fydd Seren Lockwood ar gael ar ôl asesiad anaf i’r pen, ond mae Undeb Rygbi Cymru yn dweud y bydd ar gael ar gyfer dwy gêm Cymru yn erbyn Japan fis nesaf.

Bydd Cymru yn chwarae Japan yn Tokyo ar 24 Hydref cyn yr ail gêm yn Kumagaya ar 31 Hydref.

Bydd y gêm rhwng Cymru ac UDA yn dechrau am 15:00 ddydd Sadwrn ym Mharc yr Arfau, ac fe fydd yn cael ei darlledu’n fyw ar BBC One Wales.