Mae tad bachgen tair oed a gafodd ei ganfod yn farw wedi rhoi teyrnged i’w fab.

Disgrifiodd Rhys Woods ei fab Noah fel y “bachgen bach mwyaf annwyl a diniwed, heb ddim ond cariad i’w roi”.

Cafodd Noah Woods ei wahanu oddi wrth berthynas ar ôl ymweld â maes chwarae yn Merriam Close, Brantham, brynhawn Mawrth, yn ôl Heddlu Suffolk.

Ymunodd tua 1,300 o aelodau’r cyhoedd â’r chwilio am y bachgen bach. Dywedodd yr heddlu nad oedd Noah yn gallu siarad a’i fod yn rhannol fyddar.

Roedd hofrenyddion, gwylwyr y glannau, y gwasanaeth tân ac achub, gwirfoddolwyr chwilio ac achub ar dir isel ac asiantaethau eraill hefyd wedi ymuno â’r heddlu i chwilio.

Dros 24 awr ar ôl iddo ddiflannu, cadarnhaodd yr heddlu yn hwyr brynhawn Mercher fod timau deifio wedi dod o hyd i gorff plentyn mewn llyn.

'Dim geiriau'

Ddydd Iau, rhoddodd tad Noah, Rhys Woods, deyrnged i’w fab.

“Fel rwy’n siŵr eich bod chi i gyd wedi gweld, ein Noah bach ni yw’r un gafodd ei ganfod yn Decoy Pond," meddai.

“Does dim geiriau i ddisgrifio poen y golled hon. Rydym i gyd wedi torri ein calonnau’n llwyr.

“Noah oedd y bachgen bach mwyaf annwyl a diniwed, heb ddim ond cariad i’w roi, ac rydym yn mynd i’w golli gymaint.”

Dywedodd y bydd Noah yn cael ei garu am byth ac na fydd byth yn cael ei anghofio.

Ychwanegodd: “Mae wedi bod yn fraint bod yn rhieni i ti a gallu llenwi’r tair blynedd fer roeddet ti gyda ni â chymaint o gariad.”

Image

Diolchodd hefyd “i bawb… a ddaeth ynghyd i chwilio am ein bachgen”.

“Mae’n ymddangos ei fod wedi cael effaith ar y genedl gyfan,” meddai..

Dywedodd yr heddlu ddydd Mercher nad oedd y plentyn wedi marw mewn amgylchiadau amheus, ac y byddai’r crwner yn cael gwybod.