"Os yw'r datblygiad arfaethedig yn dymuno gollwng dŵr gwastraff i'r carthffos gyhoeddus, rydym wedi ystyried effaith y llif dŵr gwastraff a gynhyrchir gan y datblygiad ac wedi dod i'r casgliad ei bod yn annhebygol bod digon o gapasiti i ddarparu ar gyfer y datblygiad o fewn y system garthffosiaeth gyhoeddus leol heb niweidio'r gwasanaethau presennol a ddarparwn i'n cwsmeriaid, nac effeithio'n negyddol ar ddiogelu'r amgylchedd."

Nid oedd digon o wybodaeth yn y cais i esbonio faint o ddŵr fyddai ei angen i oeri unrhyw gyfarpar chwaith meddai Dŵr Cymru yn eu hymateb:

"Mae'r ddogfennaeth yn darparu manylion cyfyngedig ynghylch y technolegau oeri penodol y bwriedir eu defnyddio. 

"Mae'n hysbys iawn y gall rhai technolegau oeri ddefnyddio symiau sylweddol o ddŵr. 

"Er mwyn sicrhau nad oes unrhyw effaith niweidiol ar gyflenwadau dŵr yfed yn yr ardal gyfagos, gofynnwn i'r wybodaeth ganlynol gael ei chyflwyno i gefnogi'r cais: Disgrifiad manwl o'r technolegau a'r dulliau oeri arfaethedig; ac amcangyfrif o'r defnydd dyddiol a blynyddol o ddŵr fesul adeilad."

Dywedodd Dŵr Cymru mai eu bwriad oedd datgan gwrthwynebiad dros dro ('holding objection') i'r datblygiad o ganlyniad.

Image

Mae gwrthwynebiad i'r cynllun hefyd o dros y Fenai ym Môn.

Wrth ymateb i'r cais cynllunio, dywedodd Colette Redfern o Wasanaeth Rheoleiddio a Datblygu Economaidd Cyngor Môn fod yr awdurdod cynllunio lleol yn gwrthwynebu'r datblygiad ar sail "effaith weledol sylweddol."

"Mae'r safle yn gwynebu Ardal Harddwch Naturiol Eithriadol Ynys Môn a bydd y datblygiad yn cael effaith niweidiol ar y golygfeydd o'r AHNE. 

"Mae angen gwybodaeth ychwanegol i asesu’r effaith weledol y datblygiad, fel trawsdoriad trwy'r safle o'r A4871 i’r Afon Menai," ychwanegodd.

'Anferth ei faint'

Mae Cyngor Tref Caernarfon wedi nodi gwrthwynebiad i'r cynllun, gan ddweud fod y "diffyg manylion allweddol yn rhwystredig".
 
Dywed y cyngor fod y datblygiad yn "anferth ei faint, a byddai’r gwasanaeth a gynigir yn mynd ymhell y tu hwnt i anghenion y boblogaeth leol yng ngogledd-orllewin Cymru, ac o bosibl gogledd Cymru, Cymru gyfan, a thu hwnt."

"Er bod y cynllun yn cynnwys tir ôl-ddiwydiannol... mae hefyd yn cynnwys tir glas sy’n cael ei ffermio ar hyn o bryd. Mae colli’r adnodd hwn ar gyfer cynhyrchu bwyd yn peri pryder."

Ychwanegodd y cyngor fod pryderon hefyd am effaith amgylcheddol y ganolfan: "Byddai’r cynllun hefyd yn effeithio ar goedlannau; mae hyn yn bryder o safbwynt cynnal amrywiaeth o rywogaethau anifeiliaid a phlanhigion gwyllt."

Ymysg eu pryderon eraill roedd pryder am effaith llwybr beicio Lôn Las gerllaw, yr effaith ar drigolion cyfagos, a'r defnydd o wres.

"O ystyried ei leoliad, ymddengys na fyddai’n ymarferol gwneud defnydd cadarnhaol o’r gwres a gynhyrchir gan y broses."

Mae Cyngor Cymuned y Felinheli hefyd wedi codi pryderon am y datblygiad, gydag "uchder yr adeilad arfaethedig yn parhau i fod yn bryder."

"Mynegwyd dewis am ddyluniad sy’n osgoi llinellau syth caeth ac sy’n cynnwys mwy o wydr i leddfu’r effaith weledol" meddai'r cyngor.

Ychwanegodd fod y "cynigion presennol ar gyfer budd cymunedol yn ymddangos yn gyfyngedig."

"Argymhellir ymrwymiadau pendant, megis gwelliannau i Lôn Las, er mwyn sicrhau manteision lleol pendant o’r datblygiad."

Image

Bywyd gwyllt

Mae RSPB Cymru wedi gwrthwynebu'r cais, a hynny ar sail adroddiad amgylcheddol "diffygiol".

Dywed y corff gwarchod adar fod ganddyn nhw bryderon am "effeithiau niweidiol posibl ar boblogaethau o adar sydd o bwysigrwydd cydnabyddedig o ran cadwraeth; a diffygion mewn arolygon adar a diffyg mesurau lliniaru priodol."

"Mae'r cais yn brin o ddata cyfoes pwysig am adar. Credwn fod absenoldeb arolwg bridio yn anderbyniol. Argymhellwn ddarparu asesiad ecolegol o'r nythfa gwylanod, gan gynnwys arolwg penodol i bennu nifer y parau sy'n bridio. 

"Dylai'r asesiad bennu effaith y cynnig a chynnwys mesurau lliniaru."

Nid oedd gan Wasanaeth Tân Gogledd Cymru unrhyw wrthwynebiad yn eu hymateb i'r cais.

Ymateb y datblygwr

Wrth ymateb i ymholiad gan Newyddion S4C i bryderon am ddefnydd y ganolfan ddata o ddŵr, a'r effaith amgylcheddol ar y safle, dywedodd llefarydd ar ran Canolfan Ddata Menai:

“Ni fydd unrhyw effaith ar gyflenwadau dŵr lleol, ac ni fyddwn yn tynnu dŵr o’r Fenai.

“Mae’r ffigur o bron i 12 miliwn o litrau y dydd a nodwyd yn yr adroddiad yn cynrychioli senario lle byddai’r defnydd o ddŵr ar ei uchaf, nid y gofyniad dyddiol disgwyliedig. 

"Yn seiliedig ar y technolegau oeri diweddaraf, y senario mwyaf tebygol a nodir yn ein datganiad amgylcheddol yw y bydd angen tua 700,000 litr o ddŵr y dydd. 

"Mae hyn yn gymaradwy â gofynion dŵr gwesty mawr, ysbyty neu gyfleuster cynhyrchu bwyd.

“Bydd y datblygiad hwn hefyd yn mynd i’r afael â’r perygl y mae’r safle wedi’i beri i iechyd a diogelwch y cyhoedd ers blynyddoedd. 

"Mae safle hen ffatri Ferodo wedi bod yn beryglus ac wedi’i halogi ag asbestos ers 2008, gydag achosion mynych o fandaliaeth a llosgi bwriadol."

Ychwanegodd y cwmni y byddai'r cynlluniau yn "sicrhau bod y safle’n cael ei lanhau’n drylwyr, a hynny drwy gyllid preifat." 

"Bydd hyn yn cynnwys cael gwared ag asbestos a halogiad arall yn ddiogel, yn unol â rheoliadau gwastraff peryglus. Bydd y gwaith yn mynd i’r afael â’r risgiau y mae’r safle’n eu peri ar hyn o bryd, heb roi unrhyw faich ariannol ar y cyngor na thrigolion lleol."

Llywodraeth Cymru

Wrth ymateb i ymholiad gan Newyddion S4C ynglŷn a'i safbwynt ar ganolfannau data, dywedodd llefarydd ar ran Llywodraeth Cymru: “Rydym yn credu mewn dull cynaliadwy a chytbwys i ddatblygu canolfannau data. Rydym yn cydnabod bod canolfannau data yn ddwys o ran ynni. 

"Wrth i’r galw am seilwaith digidol dyfu, mae’n bwysig bod datblygiadau newydd yn defnyddio technolegau a dulliau sy’n lleihau’r defnydd o ynni ac adnoddau.

 “Mae unrhyw ddatblygiad canolfan ddata arfaethedig yn parhau i fod yn ddarostyngedig i’r system gynllunio bresennol a’r rheoliadau amgylcheddol, gyda gwiriadau a chydbwyseddau cadarn ar waith i sicrhau bod effeithiau amgylcheddol a chymunedol yn cael eu hystyried yn briodol cyn rhoi caniatâd."

Ychwanegodd y llefarydd: “Mae gan fuddsoddiadau mewn canolfannau data y potensial i greu cyfleoedd economaidd newydd a chefnogi cyflogaeth fedrus. 

"Ond mae Llywodraeth Cymru yn credu bod rhaid i fusnesau, cymunedau ac economi ehangach Cymru deimlo manteision unrhyw fuddsoddiad.”