Mae ci a fu’n gefn i AS Gogledd Caerdydd Anna McMorrin pan gafodd ei gorfodi i ffoi o berthynas camdriniol wedi ennill teitl Ci’r Flwyddyn San Steffan.

Cafodd Cadi, ci gwaith sbaniel cocer saith oed, ei choroni’n enillydd y gystadleuaeth yn Llundain ddydd Iau.

Wrth siarad am Cadi, dywedodd Ms McMorrin ei bod wedi bod yn gefn iddi yn ystod “un o gyfnodau anoddaf” ei bywyd.

Dywedodd iddi gael Cadi pan oedd hi’n gi bach, a’i bod wedi dod o deulu lleol.

Roedd Cadi gyda hi, meddai, pan gafodd ei gorfodi i ffoi o berthynas camdriniol.

“Roedd hi yno i fi,” meddai Ms McMorrin, gan ychwanegu bod Cadi wedi bod yn gefn iddi hi a’i phlant.

‘Mwy adnabyddus na fi’

Cynhaliwyd cystadleuaeth Ci’r Flwyddyn San Steffan yng Ngerddi Tŵr Victoria ger Senedd y DU gan y Royal Kennel Club a’r Dogs Trust.

Mae’r digwyddiad blynyddol yn ceisio tynnu sylw at les cŵn a pherchnogaeth gyfrifol, yn ogystal â rhoi cyfle i wleidyddion gystadlu â’u cŵn.

Dyma’r tro cyntaf i Cadi ennill y brif wobr, ar ôl iddi ddod yn ail yn y gystadleuaeth yn 2023.

Wrth gyflwyno Cadi ar gyfer y gystadleuaeth eleni, dywedodd Ms McMorrin fod ganddi “fwy o egni na chi hanner ei hoedran”.

Mae Cadi yn mynd gyda’r AS wrth iddi gnocio drysau yn ystod ymgyrchoedd etholiadol, ac yn ôl Ms McMorrin mae hi wedi helpu i ddechrau sgyrsiau gyda phobl yn ei hetholaeth.

“Does gen i ddim cywilydd cyfaddef ei bod hi’n fwy adnabyddus yng Ngogledd Caerdydd nag ydw i,” meddai.

Mae Cadi hefyd yn mwynhau mynd am dro hir a nofio yn y môr.

Dywedodd Ms McMorrin fod teithio’n rheolaidd rhwng Caerdydd a San Steffan yn gallu tarfu ar drefn Cadi, a bod ei merched yn helpu i ofalu amdani yn ystod yr wythnos.

Ychwanegodd fod dod adref at Cadi ar ôl diwrnod hir ac anodd yn “anrheg”, a bod ei chariad a’i chwmni yn gallu gwneud hyd yn oed y dyddiau anoddaf yn well.

Roedd Mabel, ci achub yr AS dros Ddwyrain Clwyd Becky Gittins, hefyd ymhlith y cŵn oedd yn cystadlu eleni.