Mae ymgynghoriad wedi ei lansio ar gyfyngu ar ffonau symudol mewn ysgolion yng Nghymru. 

Fe fydd yr ymgynghoriad ar agor am 12 wythnos, ac yn helpu i lunio'r canllawiau i gefnogi ysgolion i ddatblygu polisi ffonau symudol. 

Bydd y canllawiau newydd yma yn cael eu cyhoeddi yn gynnar yn 2027, yn ôl Llywodraeth Cymru. 

Daw hyn mewn ymateb i bryderon cynyddol am yr effaith y mae'r defnydd o ffonau symudol yn ei chael ar lesiant, dysgu ac ymddygiad dysgwyr.

Mae'r llywodraeth hefyd yn dweud eu bod yn cydnabod y rôl bwysig y gall technoleg ddigidol ei chwarae mewn addysg pan yn cael ei defnyddio mewn ffordd briodol.

Ychwanegodd y llywodraeth eu bod yn gobeithio y bydd y canllawiau yn darparu "mwy o eglurder a chysondeb ledled Cymru" ac yn "helpu ysgolion i ddatblygu a gwella eu polisïau ffonau symudol".

'Clir a chadarn'

Dywedodd y Gweinidog Cabinet dros Addysg a’r Gymraeg, Anna Brychan: "Roedd Cynllun y 100 Diwrnod Cyntaf yn cynnwys ymrwymiad clir i weithredu ar y mater o ddefnydd ffonau symudol mewn ysgolion.

"Rwy’n cefnogi’n llawn, ac yn annog yn gryf, gyflwyno cyfyngiadau clir a chadarn ar ddefnyddio ffonau symudol yn ystod y diwrnod ysgol, hyd at ac yn cynnwys cyfyngiad llwyr ar draws safle’r ysgol. 

"Mae’r effaith y gall ffonau symudol, cyfryngau cymdeithasol a thechnoleg ehangach ei chael ar lesiant, ymddygiad a phrofiadau dysgu yn sylweddol, ac mae ysgolion a theuluoedd wedi codi pryderon dilys am dynnu sylw yn yr ystafell ddosbarth."