Mae Kris Meeke wedi ennill Rali Ceredigion 2026, gan sicrhau ei fuddugoliaeth gyntaf ym Mhencampwriaeth Rali Ewrop.

Fe orffennodd Meeke a'i gyd-yrrwr Noel O'Sullivan 38.6 eiliad o flaen Teemu Suninen ac Antti Haapala, gyda Miko Marczyk a Szymon Gospodarczyk yn gorffen yn drydydd. 

Daeth gobeithion y Cymro Osian Pryce i ben ar gymal 14 ddydd Sul, wrth iddo orfod camu o'r neilltu, oherwydd problem gyda blwch gêr ei gar Toyota GR Yaris Rally2. 

Roedd Pryce ac Evans ymhlith y gyrwyr oedd yn cystadlu am bwyntiau Pencampwriaeth Rali Prydain yn ogystal â chanlyniad cryf yn y ras gartref.

Roedd Meeke, oedd yn gyrru Toyota GR Yaris Rally2, wedi dechrau'r diwrnod olaf gyda mantais o 20.5 eiliad dros Suninen.

Fe lwyddodd i ymestyn y fantais ddydd Sul, gyda Suninen yn colli rheolaeth dros ei gerbyd ar gymal 14 a difrodi blaen ei gar.

Er iddo orffen yn ail, roedd y canlyniad yn ddigon i Suninen sicrhau teitl Pencampwriaeth Rali Ewrop am y tro cyntaf, gydag un rownd o'r bencampwriaeth yn weddill. 

Dyma fuddugoliaeth gyntaf Meeke mewn rali yn y DU ers 2007. 

Meirion Evans oedd y Cymro a orffennodd yn y safle uchaf, gan orffen yn bumed gyda'i gyd-yrrwr Dale Furniss.

Dyma ganlyniad gorau Evans erioed mewn rownd o Bencampwriaeth Rali Ewrop. Fe orffennodd Max McRae yn bedwerydd, gyda'r ddau yn elwa ar broblemau Osian Pryce yn ystod y diwrnod olaf. 

Roedd Pryce a'i gyd-yrrwr James Morgan yn chweched ar ddiwedd dydd Sadwrn, 1 munud a 21.6 eiliad y tu ôl i Meeke. 

Roedd y nifer fwyaf erioed o geir yn cystadlu yn y rali eleni, gyda 149 o geir a chystadleuwyr o 18 o wledydd yn teithio i Geredigion.

Roedd 16 o gymalau dros 191 cilometr o ffyrdd caeedig rhwng dydd Gwener a dydd Sul.

Mae’r digwyddiad yn rhan o Bencampwriaeth Rali Ewrop a Phencampwriaeth Rali Prydain. 

Am y tro cyntaf eleni, roedd hefyd yn rhan o Bencampwriaeth Rali Hanesyddol Ewrop, ar gyfer ceir a gafodd eu cynhyrchu cyn 1992.