Bydd y rhai a laddodd PC Andrew Harper yn cael eu heithrio o'r cynllun rhyddhau cynnar, ar ôl i Brif Weinidog y DU gyhoeddi na fydd unrhyw un a gafwyd yn euog o ladd anghyfreithlon yn gymwys.

Dywedodd Andy Burnham y bydd "cannoedd" o bobl yn parhau yn y carchar fel rhan o'r newidiadau i'r cynllun sy'n ceisio gwneud mwy o le mewn carchardai.

Bydd carcharorion sydd wedi'u dyfarnu'n euog o droseddau rhyw hanesyddol yn erbyn plant hefyd yn cael eu heithrio o'r newidiadau.

Dywedodd Mr Burnham: "Rwy'n gwybod pa mor gryf y mae pobl yn teimlo am y mater hwn. Rwy'n deall y pryder a'r dicter, oherwydd rwy'n eu rhannu.

"Dyna pam y gwnes i weithredu yn ystod fy wythnosau cyntaf fel Prif Weinidog i atal rhai o'r gwaethaf mewn cymdeithas rhag cael eu rhyddhau.

"Fe weithredon ni'n gyflym i atal troseddwyr ffiaidd sy'n cyflawni treisio, yn cam-drin plant yn rhywiol ac yn meithrin perthynas amhriodol â phobl ifanc fregus."

Fe aeth ymlaen i ddweud: "Ond rwyf wastad wedi dweud fy mod eisiau gwneud mwy. Bellach, nid yn unig y bydd troseddwyr sydd wedi cael dedfryd am ymosodiad anweddus yn aros dan glo, ond hefyd y rhai sydd yn y carchar am ddynladdiad a marwolaeth drwy yrru peryglus.

"Mae hyn yn golygu na fydd dedfryd y troseddwyr erchyll sy'n gyfrifol am ladd PC Andrew Harper yn cael ei byrhau."

'Diolchgar'

Fe orchmynnodd y Prif Weinidog adolygiad o'r newidiadau i'r Ddeddf Dedfrydu, sydd i ddod i rym ym mis Medi.

Daeth hynny yn dilyn beirniadaeth chwyrn o'r cynllun, ar ôl i'r wybodaeth ddod i'r amlwg y gallai Albert Bowers a Jessie Cole gael eu rhyddhau'n gynnar ar ôl treulio dim ond hanner eu dedfrydau o 13 mlynedd yn y carchar.

Roedden nhw'n deithwyr mewn car a lusgodd PC Harper ar hyd lôn wledig ar ôl i'r heddwas gael ei ddal mewn strap a oedd wedi'i gysylltu â'r cerbyd. 

Roedd y car yn ffoi o leoliad lladrad beic cwad yn Berkshire yn 2019.

Dywedodd Mr Burnham y byddai modd creu lle ychwanegol mewn carchardai drwy alltudio carcharorion tramor a rhyddhau rhai sydd wedi cael dedfrydau amhenodol o dan y cynllun Carcharu er Diogelu'r Cyhoedd.

Cafodd y dedfrydau eu rhoi i droseddwyr a oedd yn cael eu hystyried yn risg sylweddol i'r cyhoedd rhwng 2005 a 2012.

Mae disgwyl i'r Ysgrifennydd Cyfiawnder, Alex Norris, ddatgelu manylion llawn y newidiadau diweddaraf pan fydd y Senedd yn dychwelyd.

Image

Dywedodd mam PC Harper, Debbie Adlam, wrth BBC Breakfast ei bod yn teimlo'n "ddiolchgar".

"Rwy’n falch nad oes rhaid i ni fynd drwy ddim mwy o hyn bellach, ac rydych chi’n gwybod y byddant yn gorfod treulio’r ddedfryd yr oeddent i fod i’w threulio mewn gwirionedd," meddai.

"Er hynny, mae’n gymysgedd mawr iawn o emosiynau, oherwydd ar un llaw rydym yn falch, ond rydym wedi bod drwy uffern, a dim ond wedi dychwelyd i’r man lle’r oeddem ar y dechrau.

"Ewch yn ôl ychydig fisoedd, a dyma lle’r oeddem - felly nid ydym yn gwneud unrhyw gynnydd nac unrhyw beth. 

"Rydym yn llythrennol yn ymladd i ddychwelyd i’r man lle’r oeddem. Felly, rwy’n falch, ac rwy’n wirioneddol ddiolchgar mai dyma fu’r canlyniad i ni. 

"Rwy’n poeni’n arw am bobl nad yw hyn yn digwydd iddynt, ac rwy’n credu, yn realistig, fod y system gyffredinol wedi gadael rhai bylchau enfawr o hyd.

"Ac rwy’n gobeithio’n fawr y bydd yr hyn y mae Andy Burnham yn ei ddweud yno, sef y byddant yn mynd ati i ailwampio’r system ymhellach dros yr ychydig flynyddoedd nesaf - mae gwir angen i hynny ddigwydd er ein mwyn ni."