Mae Gwasanaeth Tân ac Achub De Cymru wedi gwneud cais am gymorth gan y fyddin wrth i danau gwyllt barhau mewn rhannau o ganol de Cymru.

Dywedodd y gwasanaeth eu bod wedi cyflwyno cais am gymorth milwrol i’r Awdurdodau Sifil, er mwyn darparu cymorth logistaidd a thactegol ychwanegol wrth i’r tywydd poeth a'r tanau barhau.

Daw’r cais am gymorth y fyddin yn Sir Gâr yn dilyn y cyfnod estynedig o dywydd poeth a galw sylweddol ar adnoddau’r gwasanaeth tân ac achub, gyda diffoddwyr tân, staff ystafelloedd rheoli a thimau cymorth wedi bod yn gweithio ddydd a nos.

Dywedodd y gwasanaeth fod y cais yn rhan o gynlluniau sydd wedi’u sefydlu ers tro ar gyfer ymdrin â digwyddiadau hirfaith a chymhleth, a’i fod wedi’i gyflwyno wedi i’r sefyllfa gyrraedd y lefel briodol o fewn y trefniadau hynny.

Dywedodd Matt Jones, Prif Swyddog Tân Cynorthwyol Gwasanaeth Tân ac Achub De Cymru: “Ein blaenoriaeth o hyd yw diogelu cymunedau gan sicrhau ein bod yn gallu cynnal ein hymateb cyhyd ag y bydd yr amodau’n mynnu hynny.

“Mae gofyn am gymorth milwrol yn gam synhwyrol a rhagofalus sy’n darparu capasiti cymorth ychwanegol, yn cryfhau ein cydnerthedd ac yn ein helpu i barhau i ddiogelu’r cymunedau rydym yn eu gwasanaethu.”

Ychwanegodd y byddai’r cymorth hefyd yn helpu i sicrhau lles diffoddwyr tân a staff sydd wedi bod yn gweithio mewn amodau heriol dros gyfnod estynedig.