Mae Prif Weinidog Israel, Benjamin Netanyahu, wedi gwrthod cynllun 15 pwynt Donald Trump ar gyfer Gaza, gan ddweud na fydd lluoedd Israel yn cilio o’r diriogaeth nes bod Hamas wedi’i ddiarfogi’n llwyr. 

Wrth siarad cyn cyfarfod o gabinet Israel ddydd Sul, dywedodd Netanyahu fod ei lywodraeth yn gwrthod y ddogfen a luniwyd gan Fwrdd Heddwch Trump.

Dywedodd na fydd byddin Israel yn cilio nes bod Hamas wedi’i ddiarfogi “go iawn”, gan fynnu bod hynny’n cynnwys ei holl arfau.

Cyhoeddodd Trump ddiwedd mis Gorffennaf fod cytundeb wedi’i gyrraedd ar gyfer “diarfogi llwyr” Hamas a grwpiau arfog eraill yn Gaza.

Ond mae anghytuno wedi bod ynghylch sut y byddai hynny’n digwydd, ac yn benodol ynghylch trefn diarfogi Hamas a thynnu lluoedd Israel allan o rannau o Gaza.

Mae Hamas wedi dweud na fyddent yn bwrw ymlaen â’r cytundeb oni bai bod Israel yn atal eu hymosodiadau ac yn tynnu eu milwyr yn ôl i’r hyn sy’n cael ei alw’n “llinell felen”, fel y nodwyd yng nghytundeb y cadoediad. 

Dywedodd Netanyahu fod trafodaethau gyda’r Unol Daleithiau yn parhau, gan ychwanegu bod rhai o syniadau Washington yn dderbyniol i Israel ac eraill ddim.

Daw’r anghytuno diweddaraf wrth i ymdrechion diplomyddol barhau i geisio sicrhau heddwch mwy parhaol yn Gaza, yn dilyn y rhyfel a ddechreuodd ar ôl ymosodiadau Hamas ar Israel ar 7 Hydref 2023.