Mae’r cyflwynydd Alex Jones wedi dweud ei bod hi’n “rhy ofnus” i gyfaddef ei bod hi eisiau gweithio ym myd teledu pan oedd hi’n ferch ifanc.

Mae’r ddarlledwraig, sy’n 49 oed, yn fwyaf adnabyddus am gyflwyno rhaglen The One Show ar y BBC ers 2010.

Wrth iddi dyfu i fyny yn Sir Gâr, doedd hi ddim yn credu erioed y byddai gyrfa o’r fath yn bosibl, meddai.

Dywedodd: “Pan oeddwn i’n ferch fach yn tyfu i fyny yn ne Cymru, roeddwn i’n meddwl y byddwn i’n hoffi bod yn gyflwynydd, ond roeddwn i’n rhy ofnus i ddweud dim byd oherwydd doedd neb yn ne Cymru yn dod yn ddarlledwyr, yn enwedig nid ar deledu cenedlaethol."

Wrth gofio diwrnod pan gyflwynodd raglen o Gastell Windsor, ychwanegodd: “Roeddwn i wir yn meddwl am y ferch fach honno y diwrnod hwnnw ac yn meddwl ‘alla i ddim credu mai dyma beth rydw i’n ei wneud fel swydd’.”

Mae Jones yn credu bod y One Show wedi parhau i fod yn llwyddiant oherwydd ei “hamrywiaeth”.

Dywedodd: “Mae’n braf i’r gynulleidfa droi’r teledu ymlaen am 7pm a gweld y gwesteion hyn o’r ffilmiau mawr diweddaraf ochr yn ochr ag eitem fideo hyfryd am fyd natur neu gystadleuaeth ysgrifennu 500 Words.

“Mae’n apelio at gynulleidfa eang oherwydd yr amrywiaeth a’r cynnwys. Mae’n llawn cynnwys ac yn rhaglen sydd wedi’i llunio mor ofalus.

“Rwy’n credu y bydd lle iddi bob amser oherwydd ei bod yn ffordd gadarn iawn o ddechrau’r noson.”

Fe wnaeth Alex Jones weithio fel ymchwilydd teledu ar ôl y brifysgol ond cafodd ei diswyddo ddwywaith, gan gynnwys unwaith am gamgymryd y canwr Mike Peters o’r band The Alarm am weithiwr a oedd yn y swyddfa i drwsio larwm.

Yn 21 oed, gofynnodd cynhyrchydd iddi wneud clyweliad o flaen y camera, a dechreuodd gyflwyno ar S4C a BBC Choice.

Fe fydd The One Show yn dathlu pen-blwydd yn 20 oed y mis hwn gyda wythnos o raglenni arbennig.