Mae'r bocsiwr o Gaerdydd, Joe Cordina, wedi gwadu ymosod ar ddyn arall y tu allan i orsaf betrol yn y brifddinas.

Fe wnaeth cyn-bencampwr bocsio'r byd ymddangos yn Llys Ynadon Caerdydd ddydd Mawrth, gan bledio'n ddieuog i ddau gyhuddiad o ymosod.

Dywedodd Heddlu De Cymru yn flaenorol fod y cyhuddiadau mewn cysylltiad â digwyddiad y tu allan i Orsaf Betrol Pentwyn, Caerdydd, ar 27 Chwefror eleni.

Yn ystod y gwrandawiad byr, fe wnaeth Cordina, 34 oed, ymddangos yn y doc ynghŷd â dyn arall o'r enw Jamie O’Brien, 32 oed, o Bentwyn.

Mae O'Brien hefyd wedi’i gyhuddo o ymosod mewn cysylltiad â’r digwyddiad.

Clywodd y llys yn flaenorol fod y troseddau honedig y mae’r ddau ddyn wedi cael eu cyhuddo o'u cyflawni "yn erbyn ei gilydd".

Ddydd Mawrth, dywedodd Nadeem Majid, a oedd yn cynrychioli Cordina, fod yr ail gyhuddiad o ymosod yn ei erbyn "yn deillio o un digwyddiad parhaus".

Ni wnaeth O’Brien gyflwyno ple yn ystod y gwrandawiad.

Mae'r Barnwr Rhanbarthol Charlotte Murphy wedi nodi 13 Hydref fel dyddiad achos llys ar gyfer Cordina.

Roedd disgwyl i Cordina focsio am deitl pwysau ysgafn WBO yn yr Unol Daleithiau ar 4 Gorffennaf, ond cafodd ei gais am fisa ei wrthod.

Llun: PA