Mae Andy Burnham yn cynnig “dechrau newydd” i'r berthynas rhwng llywodraethau'r DU a Chymru, yn ôl un gweinidog cabinet.

Dywedodd Dafydd Trystan Davies, gweinidog cabinet Llywodraeth Cymru dros effeithiolrwydd llywodraeth a'r cyfansoddiad, wrth BBC Politics Wales fod "cyfle gwirioneddol" i weithio mewn partneriaeth os daw Mr Burnham yn brif weinidog.

Mae Mr Burnham – cyn-faer Manceinion Fwyaf sydd bron yn sicr o olynu Syr Keir Starmer – wedi cyhoeddi cynlluniau gyda phŵer yn cael ei drosglwyddo o San Steffan i'r rhanbarthau.

Dywedodd Dr Davies, sydd wedi nodi bod datganoli rhagor o bwerau i Gymru yn un o brif flaenoriaethau ei Lywodraeth, fod cynlluniau Mr Burnham yn "adlewyrchiad o'i gyfnod yn Lloegr" ac yn canolbwyntio ar lywodraeth leol.

Dywedodd: “Byddwn i’n gobeithio y bydd yn gwrando ar leisiau yng Nghymru ac yn yr Alban sy’n gallu cyflwyno’r achos dros ddatganoli i’n llywodraethau cenedlaethol yma yng Nghymru ac yn yr Alban.

"Mae cyfle gwirioneddol i weithio mewn partneriaeth yno, cychwyn newydd ar lefel y DU a chychwyn newydd yn y berthynas honno â Llywodraeth Cymru.

“Dydw i ddim yn hollol siŵr a yw ‘Tîm Burnham’ yn gwybod beth yw eu safbwynt ar ddatganoli i Gymru a’r Alban, ac rydym yn barod i weithio gyda nhw ac i wneud y newidiadau cadarnhaol hynny a datganoli rhagor o bwerau i Gymru.”

Daeth Plaid Cymru i rym yng Nghymru ym mis Mai a dywedodd Prif Weinidog Cymru Rhun ap Iorwerth, ei fod yn gobeithio cael perthynas adeiladol â Llywodraeth y DU ac iddo gael galwad ffôn ragarweiniol gyda Syr Keir, ond ni ddigwyddodd y cyfarfod a gynlluniwyd rhwng yr arweinwyr ym mis Mehefin.