Fe wnaeth miloedd o bobl heidio i Gôr y Cewri fore Sul i weld yr haul yn codi am 04:25 ar ddiwrnod hiraf y flwyddyn.

Dywedodd English Heritage fod cymaint â 20,000 o bobl wedi ymgynnull yno eleni.

Dywedodd Georgia Butters, Pennaeth Côr y Cewri yn English Heritage, fod y wawr wedi bod yn “wirioneddol hyfryd” eleni.

“Mae dod at ein gilydd wrth y gofeb eiconig hon ar gyfer heuldro’r haf yn draddodiad sy’n dod â phobl ynghyd o bell ac agos,” meddai.

“Roedd yn hyfryd gweld teuluoedd a ffrindiau’n cymryd rhan yn y profiad llawen hwn.”

Image

Yr heuldro yw un o’r unig achlysuron blynyddol pan mae English Heritage yn caniatáu i bobl fynd yn agos at gerrig Côr y Cewri.

Mae ‘cerrig gleision’ byd-enwog Côr y Cewri yn dod o safle yn agos at Fynyddoedd y Preseli yn Sir Benfro.

Does neb wir yn gwybod pam y cafodd Côr y Cewri ei adeiladu.

Mae Côr y Cewri yn gofeb a adeiladwyd yn union ar linell gwawr canol haf a machlud canol gaeaf.

Image

Ar heuldro’r haf, mae’r haul yn codi y tu ôl i’r Maen Sawdl - y fynedfa hynafol i’r cylch cerrig - ac mae pelydrau’r haul yn cael eu sianelu i ganol y gofeb.

Credir bod heuldro’r haf wedi cael ei ddathlu yng Nghôr y Cewri ers miloedd o flynyddoedd.

Mae heuldro’r haf yn digwydd wrth i un o begynau’r Ddaear gyrraedd ei ogwydd mwyaf tuag at yr haul, a’r haul yn cyrraedd ei safle uchaf yn yr awyr. Mae hyn yn sicrhau y cyfnod hiraf o olau dydd yn ystod y flwyddyn.