Mae dyn yn ei saithdegau wedi marw yn dilyn gwrthdrawiad ar ffordd yr A493 ym Meirionnydd brynhawn dydd Gwener.

Yn ôl Heddlu’r Gogledd, daeth adroddiadau am wrthdrawiad rhwng beic modur a char ar yr heol rhwng Dolgellau a Thywyn toc cyn 14:30 ddydd Gwener, 10 Medi.

Daeth y gwasanaethau brys i’r digwyddiad ond bu farw’r dyn yn y fan a’r lle.

Mae’r A493 dal i fod ar gau, yn ôl yr heddlu.

Dywedodd Sarjant Liam Morris o Uned Blismona’r Ffyrdd: “Gyda thristwch, mae’r digwyddiad nawr yn cael ei thrin fel ymchwiliad i wrthdrawiad ffordd angheuol.

“Mae’r A493 yn Y Friog yn dal ar gau i ganiatáu ein cydweithwyr o’r Uned Ymchwilio Gwrthdrawiadau Fforensig i wneud eu gwaith ymchwil cychwynnol".

Mae’r heddlu’n apelio am wybodaeth gan unrhyw lygad-dystion a deunydd fideo ar geir.