CBAC yn ymddiheuro wedi camgymeriad mewn papur arholiad TGAU Cymraeg
02/06/2026
Mae bwrdd arholi CBAC wedi ymddiheuro ar ôl camgymeriad mewn papur arholiad TGAU Cymraeg.
Roedd cwestiwn ym mhapur Blwyddyn 10 papur TGAU Iaith a Llenyddiaeth Gymraeg yn cyfeirio at gymeriad o'r enw 'D.C.I. Karen Evans' yn nofel Llechi gan Manon Steffan Ros.
'D.C.I. Karen Davies' yw enw'r cymeriad yn y nofel.
Mewn datganiad, dywedodd CBAC: "Hoffai CBAC ymddiheuro am y gwall wnaeth effeithio ar rai myfyrwyr oedd yn ateb ar un rhan o'n papur TGAU Iaith a Llenyddiaeth Gymraeg.
"Er ein bod yn cynhyrchu nifer sylweddol o gwestiynau arholiad bob blwyddyn, mae digwyddiad o'r fath yn rhywbeth prin iawn, ac rydym yn cymryd y mater hwn o ddifrif.
"Byddwn yn parhau i adolygu ein prosesau er mwyn sicrhau nad yw rhywbeth o'r fath yn digwydd eto.
"Hoffem roi sicrwydd i fyfyrwyr bod gennym weithdrefnau cadarn yn eu lle i sicrhau na fyddant o dan unrhyw anfantais ac y byddant yn cael eu trin yn deg.
"Caiff ystyriaeth ofalus ei rhoi i bob ateb arholiad yn ystod y broses farcio a graddio er mwyn gwneud yn siŵr bod y canlyniad mae myfyrwyr yn ei dderbyn am eu cymhwyster yn un teg."
'Hynod siomedig'
Yn dilyn yr arholiad, roedd trafodaeth am y pwnc ar grŵp Rhwydwaith Menywod Cymru ar Facebook.
Dywedodd un aelod o'r grŵp ei bod yn "hynod o siomedig" gyda CBAC am y camgymeriad yn y papur arholiad.
"Llechi oedd y nofel bues i’n astudio a phan agores i’r papur, roedd y cwestiwn cyntaf yn gofyn am gymeriad doedd ddim hyd yn oed yn bodoli," meddai.
"Dw i erioed ‘di astudio llyfr sydd a chymeriad o’r enw DCI Karen Evans, DCI Karen Davies dw i’n nabod. Typical.
"Ma’n hynod o siomedig am fod CBAC wedi treulio cymaint o amser ar y cwrs newydd yma ac wedyn blwyddyn 10 druan yn agor y papur am 9 ac yn gweld y cwestiwn yna. Twlu plant fel ni off ac yn chwalu ein hyder cyn dechrau."
Dywedodd aelod arall: "Beth yr oedd pawb yn ei feddwl o rhan yr arholiad cymraeg ‘Llechi’ heddiw?
"Y ferch yn dweud bod yr cwestiwn cyntaf gyda enw anghywir."
