Mae sylwadau gan aelod Reform UK o'r Senedd ym Mae Caerdydd am hepgor baner Wcráin o adeiladau'r sefydliad wedi sbarduno dadl wleidyddol.

Dywedodd Cai Parry-Jones AS fod hedfan baner Wcráin y tu allan i adeilad Senedd Cymru yn "arwydd gwag" (neu'n achos o “virtue signalling”), gan ddadlau na ddylai’r Senedd fod yn arddangos baneri gwledydd eraill ar ei hadeiladau swyddogol.

Mae’r faner las a melyn wedi cael ei harddangos y tu allan i nifer o adeiladau cyhoeddus ledled y DU ers i Rwsia oresgyn Wcráin yn 2022, fel arwydd o undod gyda phobl y wlad sydd wedi dioddef ymosodiadau a rhyfel hirfaith.

Ond dywedodd y gwleidydd Reform fod Senedd Cymru i fod i gynrychioli pobl Cymru yn unig, ac y dylai baneri swyddogol Cymru a’r Deyrnas Unedig gael blaenoriaeth.

Mae’r sylwadau wedi cael eu beirniadu gan wleidyddion o bleidiau eraill, gyda rhai’n honni bod y safbwynt yn dangos diffyg cefnogaeth i Wcráin ar adeg pan mae’r rhyfel yn parhau yn nwyrain Ewrop.

'Arwydd o undod â phobl Wcráin'

Dywedodd un gwleidydd Llafur fod arddangos baner Wcráin yn “arwydd clir o undod gyda phobl sy’n wynebu goresgyniad ac erledigaeth”, tra bod rhai o’r Democratiaid Rhyddfrydol wedi dweud bod y faner yn symbol pwysig o gefnogaeth ryngwladol. 

Mae Mr Parry-Jones hefyd wedi galw am sicrhau fo baner yr Undeb yn cael ei harddangos ochr yn ochr â'r Ddraig Goch ar bob achlysur.

Dywedodd: "Mae Cymru yn rhan falch o'r Deyrnas Unedig a dylai ystâd y Senedd adlewyrchu'r ffaith honno drwy chwifio nifer cyfartal o faneri Cymru a'r Undeb bob amser."

Image

Yn y cyfamser, mae Reform UK wedi dadlau’n gyson dros gyfyngu ar y mathau o faneri sy’n cael eu harddangos ar adeiladau cyhoeddus mewn ardaloedd lle mae’r blaid mewn grym. Yn gynharach eleni, dywedodd y blaid mai dim ond baneri’r Deyrnas Unedig, San Siôr neu siroedd lleol ddylai gael eu chwifio ar adeiladau cyngor mewn rhai rhannau o Loegr.

Mi aeth Mr Parry-Jones ymlaen i ddweud ei fod yn cytuno â'i arweinydd, gan ddweud wrth BBC Cymru: "Rwy'n sefyll yn gadarn y tu ôl i bobl Wcráin sy'n sefyll yn erbyn Putin yn dilyn ei oresgyniad anghyfreithlon o'u gwlad.

"Ond nid yw chwifio eu baner yn gwneud dim i gadw Rwsia draw.

"Mae angen i ni symud i ffwrdd o wleidyddiaeth sy'n llawn gweithrediadau gwag - mae pobl yn gweld drwyddo ac yn dymuno'n briodol i wleidyddion fynd yn ôl i ganolbwyntio ar faterion bara menyn."

Cefnogaeth

Fe fydd unrhyw benderfyniad yn y dyfodol ynghylch y baneri sy'n chwifio y tu allan i ystâd y Senedd yn nwylo'r Llywydd newydd, Huw Irranca-Davies o'r Blaid Lafur.

Dywedodd arweinydd y Ceidwadwyr Cymreig yn y Senedd, Darren Millar: "Rwy'n cefnogi chwifio baner Wcráin y tu allan i'n senedd.

"Mae'n arwydd gweladwy o wrthwynebiad pendant y Senedd i oresgyniad anghyfreithlon Rwsia o'r Wcráin.

"Ar ôl ymweld â'r Wcráin y llynedd gydag un o ASau Reform, rwy'n synnu ac yn siomedig gan eu safbwynt erbyn hyn."

Nyid yw'r Senedd wedi ymateb i sylwadau Cai Parry-Jones hyd yma.