Mae Cyngor Sir Penfro wedi gosod arwyddion yn atal pobl rhag nofio yn y môr ger traeth Lydstep, sydd ar garreg drws parc gwyliau cwmni Haven.

 

Mewn datganiad, dywedodd Cyfoeth Naturiol Cymru eu bod yn "ymwybodol o ddigwyddiad sy’n ymwneud â system garthffosiaeth dan berchnogaeth breifat. 

 

"Mae’r system wedi’i difrodi ac yn gollwng carthion i draeth Haven Lydstep, a allai gael effaith dros dro ar ansawdd y dŵr ymdrochi."

 

Dywedodd llefarydd fod y cyngor lleol "yn gosod arwyddion priodol ar y safle i gynghori’r cyhoedd i beidio mynd i mewn i’r dŵr."

 

Mae perchnogion y safle yn cynnal ymchwiliadau i ganfod ffynhonnell y broblem a gwneud gwaith trwsio. 

 

"Byddwn yn parhau i fonitro'r sefyllfa a gweithio gyda phartneriaid i sicrhau bod y mater yn cael ei ddatrys cyn gynted â phosibl, a bod risgiau i’r amgylchedd a’r cyhoedd yn cael eu lleihau hyd yr eithaf."

 

Dywedodd Cyngor Sir Penfro fod Cyfoeth Naturiol Cymru wedi rhoi gwybod i'w swyddogion am "sefyllfa annormal" ger y traeth allai gael effaith ar y dŵr yno am gyfnod.