Bydd llong bleser sydd ag achosion o'r feirws hanta ar ei bwrdd yn cael ei hangori ger yr Ynysoedd Dedwydd, meddai Gweinyddiaeth Iechyd Sbaen.

Mae tri o bobl ar y llong wedi marw, ac mae angen gofal brys ar ddau aelod o'r criw.

Y gred yw mai meddyg o Brydain yw un o'r bobl sydd angen gofal.

Roedd disgwyl iddyn nhw adael y llong mewn ambiwlans awyr ddydd Mawrth i fynd i'r Ynysoedd Dedwydd.

Mae swyddogion yn penderfynu pa deithwyr sydd angen gadael y llong ar frys tra mae hi wedi'i docio yn Cape Verde, meddai'r weinyddiaeth iechyd.

Hyd yn hyn, mae saith achos o'r feirws hanta wedi cael eu canfod — dau wedi'u cadarnhau, a phump arall lle mae amheuaeth bod gan yr unigolion y feirws.

Menyw o'r Iseldiroedd yw un o'r achosion sydd wedi cael eu cadarnhau, ac mae hi yn un o'r tri sydd wedi marw.

Yr ail achos yw dyn o Brydain a adawodd y llong yn Ne Affrica er mwyn cael triniaeth feddygol.

Fe wnaeth gŵr y fenyw o'r Iseldiroedd hefyd farw, ond dydi o ddim yn achos sydd wedi cael ei gadarnhau.

Dyna yw'r sefyllfa gyda'r trydydd person hefyd sydd wedi marw. Roedd gan y person yma gysylltiadau â'r Almaen.

Mae gweinyddiaeth iechyd De Affrica wedi dweud bod y ddau achos sydd wedi cael eu cadarnhau yn gysylltiedig â straen Andes o'r feirws, meddai'r gwasanaeth newyddion Reuters. Mae'r straen hwnnw yn gallu cael ei drosglwyddo o berson i berson.

Ar hyn o bryd, mae tua 149 o bobl ar y llong o 23 gwlad wahanol. Maent “dan fesurau caeth, rhagofn”, meddai'r cwmni sydd yn gweithredu'r llong.

Yn ogystal â'r aelod o'r criw sydd o Brydain, mae 22 arall o Brydain ar fwrdd y llong.

Yn ôl Gweinyddiaeth Iechyd Sbaen, fe fydd gweddill y rhai ar y llong yn teithio i'r Ynysoedd Dedwydd. Mae disgwyl iddynt gyrraedd ymhen tri neu bedwar diwrnod.