Mae ymchwiliad llofruddiaeth wedi cael ei lansio yn dilyn marwolaeth dyn 49 oed yn ardal Wrecsam. 

Dywed Heddlu'r Gogledd fod ditectifs yn apelio am wybodaeth mewn cysylltiad â'r farwolaeth. 

Ychwanegodd y llu fod swyddogion wedi mynychu tŷ yn Rhosllanerchrugog ychydig wedi 12:00 ddydd Gwener lle'r oedd dyn wedi marw o anaf i'w ben.

Mae'r crwner wedi cael gwybod. 

Mae swyddogion yn parhau yn y tŷ wrth i'r ymchwiliad barhau. 

Dywedodd yr Uwch Swyddog Ymchwilio, y Ditectif Arolygydd Rob Mahoney: "Rydym yn deall drwy ein hymholiadau CCTV fod y dyn a fu farw yn rhan o ffrae gorfforol o gwmpas hanner dydd ar ddydd Iau 26 Mawrth ym maes parcio Bonc Wen yn Rhos. 

"Ar yr adeg yma, mae llawer o bobl wedi cael eu gweld yn cerdded heibio, gyda llawer o geir hefyd wedi parcio yn y maes parcio.

"Dwi'n gofyn i unrhyw un a welodd y digwyddiad, neu unrhyw un oedd wedi parcio yn y maes parcio ar y pryd a sydd â deunydd dashcam, i gysylltu â swyddogion."

Ychwanegodd y Ditectif Arolygydd Mahoney fod y digwyddiad yn cael ei drin fel un ynysig, ac nad yw'r heddlu o'r farn fod yna risg ehangach i'r cyhoedd. 

"Mae ein meddyliau yn parhau â theulu'r dyn yn ystod y cyfnod anodd hwn," meddai.

Mae'r llu yn gofyn i unrhyw un â gwybodaeth i gysylltu â nhw gan ddefnyddio'r cyfeirnod O045989.