Mae corff dyn wedi cael ei ddarganfod mewn bin olwyn mewn parc yn ninas Coventry yng Ngorllewin Canolbarth Lloegr, meddai’r heddlu.

Daeth aelod o’r cyhoedd o hyd i gorff y dyn, sydd heb ei adnabod eto, ym Mharc Cash oddi ar Daimler Road tua 17.00 ddydd Gwener, 13 Mawrth.

Roedd y corff mewn bin olwyn Cyngor Dinas Coventry gyda chaead gwyrdd. Y gred yw ei fod rhwng 40 a 50 oed.

Mae Heddlu Gorllewin Canolbarth Lloegr yn credu y gallai’r dyn fod wedi cael ei daro gan gerbyd cyn cael ei symud i mewn i’r parc.

Mae swyddogion yn gweithio gyda’r cyngor i gael gwybod o ble y cafodd y bin ei symud.

Dywedodd y Prif Arolygydd Ditectif Phil Poole: “Rydyn ni’n cadw meddwl agored, ond rydyn ni’n credu bod y dyn hwn wedi cael ei daro gan gerbyd ac yna wedi cael ei symud i’r parc.

“Dw i eisiau clywed ar frys gan unrhyw un sy’n credu y gallai fod wedi taro rhywun gyda’i gar ddoe, neu sydd wedi sylwi ar newid yn ymddygiad gyrrwr y maen nhw’n ei adnabod, neu sydd wedi sylwi ar ddifrod i gerbyd.

“Mae’n hollbwysig ein bod ni’n dod o hyd i’r person hwnnw cyn gynted â phosibl er mwyn i ni ddeall beth ddigwyddodd.

“Os oes unrhyw un yn yr ardal wedi sylwi bod eu bin olwyn gyda chaead gwyrdd wedi cael ei ddwyn, dw i hefyd eisiau clywed ganddyn nhw.”