Mae menywod Cymru wedi cael gêm gyfartal yng ngêm gyntaf eu hymgyrch yn rowndiau rhagbrofol Cwpan y Byd a hynny oddi cartref yn erbyn y Weriniaeth Tsiec. 

Y tîm cartref oedd y cyntaf i sgorio yn Uherske Hradiste wedi 20 munud o chwarae gydag Eva Bartonova yn sgorio o gic gornel y Weriniaeth Tsiec.  

Tarodd Cymru yn ôl cyn 30 munud o chwarae, wrth i Lily Woodham groesi'r bêl i Hannah Cain a oedd yn y man cywir wrth iddi daro cefn y rhwyd yn rhwydd.

Roedd pryder am Hannah Cain ychydig cyn hanner amser wedi iddi syrthio wrth iddi gael ei hatal rhag sgorio gôl arall, a rhyddhad pan ddychwelodd i'r gêm. 

Roedd hi'n 1-1 wrth i'r chwiban ddynodi hanner amser, ond y tîm cartref orffennodd gryfaf ar ddiwedd yr hanner cyntaf.   

Ar ddechrau'r ail hanner, daeth Carrie Jones i'r cae yn lle Ffion Morgan.

Wedi wyth munud o chwarae, aeth y Weriniaeth Tsiec yn ôl ar y blaen, wrth i Eva Bartonova groesi yn gelfydd at Jana Zufankova gan ei gwneud yn hawdd iawn iddi ddod o hyd i gefn y rhwyd.  

2-1 i'r Weriniaeth Tsiec.

Roedd y Weriniaeth Tsiec yn bygwth sgorio eu trydedd gôl, a phwysau ar Gymru i unioni'r sgôr.  

Wedi 66 munud o chwarae, daeth yr ymosodwyr Mared Griffiths ac Elise Hughes i'r cae yn lle Hannah Cain a Rachel Rowe.

Llwyddodd golwraig y Weriniaeth Tsiec, Olivie Lukasova i arbed ergyd Carrie Jones.

Daeth Mia Ross ac Esther Morgan i'r cae yn lle Angharad James a Lily Woodham wedi 81 munud o chwarae .

A chymrodd Hayley Ladd rôl y capten yn lle James.   

Roedd pedair munud o amser ychwanegol, a llwyddodd Elise Hughes i fachu gôl hwyr ym munudau ola'r gêm, gyda pheniad gwych . 

2-2 oedd y sgôr terfynol, a rhyddhad enfawr i Gymru.

Mae'r chwe gêm yn yr ymgyrch, sef tair gêm gartref a thair oddi cartref, yn cael eu chwarae ym misoedd Mawrth, Ebrill a Mehefin.

Ymunodd Jess Fishlock â thim hyfforddi Cymru ar gyfer y gêm agoriadol.

Fe wnaeth prif sgoriwr Cymru ymddeol o bêl-droed rhyngwladol ym mis Hydref, ond mae'n parhau i chwarae i dîm Seattle Reign yn America. 

Mae timau Ewrop wedi eu gwahanu i mewn i dair cynghrair, A, B a C, gyda hyd at 12 tîm yn gallu cyrraedd rowndiau terfynol y gystadleuaeth.

Fe fydd enillwyr y pedwar grŵp yng Nghynghrair A yn sicrhau eu lle yn awtomatig ar gyfer Cwpan y Byd Brasil 2027, ond fe fydd yn rhaid i’r gweddill o’r timau barhau i frwydro am le drwy’r gemau ail gyfle.

Yn rhan o gynghrair B, fe fydd Cymru yn ceisio ennill eu lle ar frig eu grŵp, sef B1, er mwyn sicrhau llwybr mwy ffafriol yn y gemau ail gyfle.

Fe fydd yna ddwy rownd o gemau ail gyfle, gyda saith tîm yn hawlio eu lle ym Mrasil yn y pen draw, tra bod yna gyfle i wythfed tîm gymhwyso drwy gêm ail gyfle yn erbyn gwlad o gyfandir gwahanol.

Felly bydd angen i Gymru adeiladu ar y perffomiad nos Fawrth, pan fyddan nhw'n wynebu Montenegro yn Llanelli ddydd Sadwrn.