Mae’r Swyddfa Dywydd wedi cyhoeddi rhybudd melyn am law i'r rhan helaeth o dde Cymru ddydd Llun.

Fe fydd y rhybudd yn dod i rym am 12.00 ddydd Llun ac yn dod i ben am 23.59.

Mae disgwyl i lawr trwm ymledu ar draws siroedd de Cymru, gyda pheryg y gallai achosi llifogydd mewn rhai cartrefi a busnesau. 

Fe allai cawodydd trwm achosi oedi ar y ffyrdd ac i drafnidiaeth gyhoeddus, ac mae'n bosib y bydd yn amharu ar gyflenwadau trydan am gyfnod, yn ôl y Swyddfa Dywydd. 

Mae disgwyl i 10-15mm o law ddisgyn yn y rhan fwyaf o lefydd o fewn ardal y rhybudd, gyda hyd at 20-30mm o law yn disgyn ar dir uwch.

Fe fydd y rhybudd yn effeithio ar y siroedd canlynol:

• Abertawe
• Blaenau Gwent
• Bro Morgannwg
• Caerdydd
• Caerffili
• Casnewydd
• Castell Nedd-Port Talbot
• Merthyr Tudful
• Pen-y-bont ar Ogwr
• Powys
• Rhondda Cynon Taf
• Sir Benfro
• Sir Fynwy
• Sir Gâr
• Torfaen