Mae gwerthwr cyffuriau wnaeth gyfaddef gwerthu cocên ar Ynys Môn wedi cael ei garcharu am ddwy flynedd a 10 mis.

Mi ymddangosodd Jordan Lee Jones, o Stad Cae Rhun, Bae Cemaes, yn Llys y Goron Caernarfon ddydd Mercher.

Mi gyflawnodd swyddogion warant yng nghartref Jones ar 22 Rhagfyr 2025, lle wnaethon nhw ddarganfod swm sylweddol o gocên ac arian parod.

Mi gafodd ei gar ei chwilio hefyd, ac mi ganfuwyd mwy o gyffuriau, arian parod ac arfau.

Wrth ymddangos o flaen y llys roedd Jordan Lee Jones eisoes wedi cyfaddef ei fod wedi bod â chyffuriau Dosbarth A yn ei feddiant gyda’r bwriad o’u cyflenwi.

Roedd hefyd wedi meddu ar eiddo troseddol ac arf ymosodol mewn lle preifat.

Dywedodd y cwnstabl Jamie McDaid nad oedd “croeso i unigolion sy’n ceisio gwneud elw ar draul pobl agored iawn i niwed ar Ynys Môn”.

“Mae cyflenwi cyffuriau anghyfreithlon yn arwain at drais, ymddygiad gwrthgymdeithasol a mwy o droseddau eraill,” meddai.

“Mae ganddo effaith ddinistriol ar unigolion, teuluoedd a chymdogaethau.

“Ni fydd delio cyffuriau yn cael ei oddef, ac mae dedfryd Jones yn rhybudd y byddwn yn ymchwilio’n gadarn ac yn mynd ar drywydd y rhai sy’n gysylltiedig.

“Dylai unrhyw un sydd â gwybodaeth am ddelio cyffuriau ar Ynys Môn roi gwybod am bryderon i’r heddlu drwy ein gwefan, drwy ffonio 101, neu’n ddienw drwy Crimestoppers.”