Mae Donald Trump wedi dweud bod “ffolineb mawr” y Deyrnas Unedig wrth ildio Ynysoedd Chagos yn brawf o’r angen i feddiannu’r Ynys Las.

Llofnododd y DU gytundeb ym mis Mai 2025 i drosglwyddo sofraniaeth dros Ynysoedd Chagos i Mauritius.

Fe wnaeth hynny wrth sicrhau prydles hirdymor ar gyfer y ganolfan filwrol hanfodol rhwng y DU a’r UDA ar ynys Diego Garcia, y mwyaf o Ynysoedd Chagos.

Dywedodd Arlywydd yr Unol Daleithiau nos Lun ei fod wedi ymrwymo i gosbi’r DU ac Ewrop gyda thariffau oherwydd eu gwrthwynebiad i’w gynllun i feddiannu’r Ynys Las.

“Mae’n syfrdanol bod ein cynghreiriad ‘gwych’ yn NATO, y Deyrnas Unedig, ar hyn o bryd yn bwriadu rhoi Ynys Diego Garcia, safle canolfan filwrol hanfodol yr Unol Daleithiau, i ffwrdd i Mauritius, a gwneud hynny HEB UNRHYW RESWM O GWBL,” meddai mewn neges ar gyfrwng Truth Social.

“Nid oes amheuaeth bod Tsieina a Rwsia wedi sylwi ar y weithred hon o wendid llwyr.

“Dyma bwerau rhyngwladol sydd yn cydnabod CRYFDER yn unig, a dyna pam mae Unol Daleithiau America, dan fy arweinyddiaeth i, bellach, ar ôl blwyddyn yn unig, yn cael ei barchu fel erioed o’r blaen.

“Mae penderfyniad y DU i roi tir hynod bwysig i ffwrdd yn weithred o FFOLINEB MAWR, ac mae’n un arall mewn rhes hir iawn o resymau pam bod rhaid meddiannu’r Ynys Las er ein diogelwch cenedlaethol.

“Mae’n rhaid i Ddenmarc a’i Gynghreiriaid Ewropeaidd WNEUD Y PETH IAWN. Diolch am eich sylw i’r mater hwn. YR ARLYWYDD DONALD J. TRUMP.”

Daw ei sylwadau wrth i Syr Keir Starmer geisio sefydlogi’r berthynas gydag arweinyddiaeth yr Unol Daleithiau yn sgil y rhwyg.

Mae wedi galw am beidio â gor-ymateb i fygythiadau arweinydd yr Unol Daleithiau o ryfel masnach.

Bydd y Prif Weinidog yn cynnal trafodaethau gyda gweinidogion yn ei gyfarfod Cabinet wythnosol ddydd Mawrth.

Yna bydd Yvette Cooper yn wynebu cwestiynu gan ASau yn ystod cwestiynau’r Swyddfa Dramor yn Nhŷ’r Cyffredin.

Davos

Mae disgwyl i Mr Trump fynd i Fforwm Economaidd y Byd yn Davos, y Swistir yr wythnos hon.

Bydd y Canghellor Rachel Reeves hefyd yn cymryd rhan mewn trafodaeth banel ochr yn ochr ag Ysgrifennydd Masnach yr Unol Daleithiau Howard Lutnick.

Bydd dirprwyaeth o'r DU hefyd yn cynnwys yr Ysgrifennydd Masnach Peter Kyle a'r Ysgrifennydd Tramor Ms Cooper.

Does dim cynlluniau ar hyn o bryd y bydd y Prif Weinidog yn mynd hefyd.

Dywedodd Mr Kyle fod y Llywodraeth yn cynnal sgyrsiau "didwyll" gyda swyddogion yr Unol Daleithiau ynghylch y bygythiad o dariffau ac mae mewn nhw cysylltiad rheolaidd â Mr Lutnick a chynrychiolydd masnach America, Jamieson Greer.

"Mae gennym berthnasoedd da a chryf. Un o'r pethau rydw i wedi'i fwynhau wrth ddod i adnabod gweinyddiaeth yr Unol Daleithiau yw eu bod nhw i gyd yn gymeriadau unigol a chymeriadau unigryw iawn," meddai Mr Kyle.

Fodd bynnag, ychwanegodd fod y berthynas rhwng y DU a'r Unol Daleithiau yn cael ei “brofi” ac "wrth gwrs, rydym yn cael sgyrsiau didwyll."

"Ond yn fy mhrofiad i, mae pob un o'r prif gymeriadau yn y weinyddiaeth yn ffynnu ar sgyrsiau didwyll ac ni fyddent yn gweithredu mewn unrhyw ffordd arall,” meddai.