Mae Gweinidog Tramor Iran, Abbas Araghchi, wedi dweud na fydd Tehran bellach yn dienyddio protestwyr sy’n gwrthwynebu llywodraeth y wlad.

Daw ei sylwadau ar ôl i Arlywydd yr Unol Daleithiau, Donald Trump, hefyd ddweud ei fod wedi derbyn sicrwydd na fydd protestwyr yn cael eu lladd na’u dienyddio o hyn ymlaen.

Roedd Twrnai Cyffredinol Iran, Mohammad Movahedi Azad, wedi dweud ddydd Sadwrn y byddai unrhyw un sy’n protestio yn “elyn i Dduw”, trosedd sy’n cario’r gosb eithaf.

Ond mewn cyfweliad â gwasanaeth newyddion Fox News ddydd Mercher, dywedodd Abbas Araghchi (uchod) nad oedd “cynllun o gwbl i grogi” pan ofynnwyd iddo a oeddent yn bwriadu dienyddio protestwyr.

Ddydd Mercher dywedodd Donald Trump ei fod wedi siarad â “ffynonellau pwysig iawn ar yr ochr arall”.

“Rydyn ni’n mynd i wylio beth yw’r broses,” meddai, cyn nodi bod gweinyddiaeth yr Unol Daleithiau wedi derbyn “datganiad da iawn” gan Iran.

'Tensiynau'

Mae cannoedd o bobl eisoes wedi cael eu lladd neu eu hanafu yn ystod y protestiadau diweddar yn erbyn llywodraeth y wlad, yn ôl adroddiadau.

Mae fideos sydd wedi cael eu cyhoeddi ar-lein yn dangos pobl ar strydoedd dinasoedd Iran, gydag adeiladau a cherbydau yn cael eu rhoi ar dân.

Wrth ymateb i’r sefyllfa, roedd Llywodraeth Iran wedi gosod gwaharddiad ar systemau cyfathrebu’r wlad.

Fe wnaeth Llywodraeth y DU gau ei llysgenhadaeth yn Iran dros dro ddydd Mercher wrth ymateb i’r anghydfod.

Fe gyhoeddodd Syr Keir Starmer hefyd fod y DU yn gweithio ar sancsiynau pellach yn erbyn y wlad er mwyn cosbi “gormes a llofruddiaethau ffiaidd” y wladwriaeth.

Mae’r DU a’r Unol Daleithiau hefyd wedi dechrau tynnu rhai gweithwyr o ganolfan awyr Al-Udeid yn Qatar, ymysg pryderon am wrthdaro newydd rhwng yr Unol Daleithiau ac Iran.

Dywedodd llywodraeth Qatar bod y gweithwyr yn cael eu symud “mewn ymateb i’r tensiynau rhanbarthol presennol”.

Caeodd Iran yr awyr uwchben y wlad i awyrennau o 02:45 amser lleol (22:15 GMT) ddydd Iau, yn ôl gwefan Gweinyddiaeth Hedfan Ffederal yr Unol Daleithiau.

Roedd disgwyl i’r cau bara dwy awr i ddechrau, ond fe gafodd ei ymestyn yn ddiweddarach i 08:00 amser lleol (03:30 GMT), yn ôl asiantaeth newyddion Reuters.

Roedd sawl cwmni hedfan wedi cyhoeddi y byddent yn ailgyfeirio teithiau awyrennau o amgylch Iran mewn ymateb, gan gynnwys Air India a Lufthansa o’r Almaen.

Llun: Gweinyddiaeth Dramor Iran drwy ZUMA Press Wire / Reuters