Mae rheolwyr bar, lle bu farw 40 o bobl yn dilyn tân, wedi cael eu rhoi dan ymchwiliad troseddol.

Cafodd 119 o bobl eraill eu hanafu yn y tân yn Le Constellation yn Crans-Montana ar Nos Galan, meddai swyddogion. 

Mae rheolwyr Le Constellation yn cael eu hamau o gyflawni llofruddiaeth drwy esgeulustod, achosi niwed corfforol drwy esgeulustod a llosgi bwriadol drwy esgeulustod, meddai swyddfa'r erlynwyr yng nghanton Valais mewn datganiad brynhawn Sadwrn.

Gyda llawer o'r rhai gafodd eu hanafu wedi'u hadnabod, mae teuluoedd yn dal i aros am wybodaeth am y rhai sy'n dal ar goll.

Cyrff dwy fenyw o'r Swistir 21 a 16 oed, a dau ddyn o'r Swistir 18 a 16 oed oedd y cyntaf i gael eu hadnabod a'u dychwelyd i'w teuluoedd, meddai'r heddlu.

Yn ôl ymchwiliad rhagarweiniol, achos tebygol y tân oedd gwreichion ar ben poteli siampên yn cael eu cario'n rhy agos at y nenfwd.

Galwodd Arlywydd y Swistir, Guy Parmelin, y digwyddiad yn "un o'r trasiedïau gwaethaf" a brofwyd gan y wlad.

Nid yw manylion pellach am y dioddefwyr gan gynnwys enwau, wedi'u rhyddhau.

Ddydd Gwener, dywedodd yr heddlu fod 113 o'r rhai oedd wedi eu hanafu wedi'u hadnabod, gan gynnwys 71 o ddinasyddion o'r Swistir, 14 o Ffrainc ac 11 o'r Eidal.

Mae llawer o bobl ifanc yn eu harddegau ymhlith y meirw a’r rhai sydd ar goll.