Mae’r Prif Weinidog Syr Keir Starmer wedi dweud “nad oedd” y DU “yn rhan” o ymosodiadau milwrol yr Unol Daleithiau ar Venezuela, na chipio Arlywydd y wlad Nicolas Maduro.

Serch hynny, mae wedi gwrthod condemnio’r ymosodiadau gan ddweud bod angen iddo sefydlu’r “holl ffeithiau” yn gyntaf.

Wrth siarad â Laura Kuenssberg o’r BBC, dywedodd Syr Keir: “Dydw i ddim wedi (siarad â’r Arlywydd Trump) ac mae’n amlwg yn sefyllfa sy’n symud yn gyflym. Mae angen i ni sefydlu’r holl ffeithiau.

“Yr hyn y gallaf ei ddweud yw nad oedd y DU yn rhan o unrhyw ffordd yn y weithred yma ac fel y byddech chi’n ei ddisgwyl rydym yn canolbwyntio ar ddinasyddion Prydeinig yn Venezuela ac yn gweithio’n agos iawn gyda’n llysgenhadaeth.

“Byddaf eisiau siarad â’r arlywydd, byddaf eisiau siarad â chynghreiriaid, ond ar hyn o bryd rwy’n credu bod angen i ni sefydlu’r ffeithiau.”

Ar ôl cael ei ofyn a oedd yn condemnio cipio Mr Maduro, dywedodd Syr Keir: “Fel y gwyddoch, rwyf bob amser yn dweud ac yn credu y dylem ni i gyd gynnal cyfraith ryngwladol, ond rwy’n credu ar y cam hwn, sefyllfa sy’n symud yn gyflym, gadewch i ni sefydlu’r ffeithiau a mynd ymlaen o’r fan honno.”

Dywedodd y Prif Weinidog fod tua 500 o ddinasyddion y DU yn Venezuela a bod gwaith yn mynd rhagddo i’w “diogelu”.

Dywedodd: “Rydym yn gweithio gyda’r llysgenhadaeth i wneud yn siŵr eu bod yn cael gofal da, eu bod yn cael eu diogelu a’u bod yn cael cyngor priodol. 

"Rydym yn gweithio ar gyflymder gyda’r llysgenhadaeth ar hynny. Mae’n nifer fach ond mae’n nifer bwysig.”

Cyngor i lochesu

Mae’r Swyddfa Dramor wedi cynghori pobl i beidio â theithio i Venezuela ac wedi rhybuddio Prydeinwyr yn y wlad i lochesu.

Dywedodd yr ysgrifennydd tramor cysgodol, y Fonesig Priti Patel, “na fydd neb yn tywallt dagrau” bod Nicolas Maduro wedi cael ei “ddisodli”.

Dywedodd: “Rydym bob amser wedi condemnio cyfundrefn greulon a gormesol Maduro ac nid oedd y llywodraeth Geidwadol yn ystyried gweinyddiaeth Maduro yn gyfreithlon.“Ni fydd neb yn tywallt dagrau dros ei gael wedi’i ddisodli.”

Dywedodd arweinydd Plaid Cymru yn San Steffan, Liz Saville Roberts: “Mae gorchymyn Trump i fomio Caracas yn afresymol. 

"Mae ei weithredoedd yn gwasanaethu i gyfreithloni trefn fyd-eang o ddrwgweithredwyr sy'n blaenoriaethu trais dros ddemocratiaeth."

Mae arweinydd y Democratiaid Rhyddfrydol, Syr Ed Davey, wedi galw ar y Prif Weinidog i gondemnio’r ymosodiadau.

Dywedodd: “Dylai Keir Starmer gondemnio gweithred anghyfreithlon Trump yn Venezuela. Mae Maduro yn unben creulon ac anghyfreithlon, ond mae ymosodiadau anghyfreithlon fel hyn yn ein gwneud ni i gyd yn llai diogel."

Dywedodd arweinydd Reform UK, Nigel Farage, y gallai ymgyrch filwrol “anghonfensiynol” yr Unol Daleithiau yn Venezuela fod yn ffordd o atal gweithrediadau ymosodol Rwsiaidd a Tsieina yn y dyfodol.

Dywedodd: “Mae gweithredoedd America yn Venezuela dros nos yn anghonfensiynol ac yn groes i gyfraith ryngwladol — ond os ydyn nhw'n gwneud i Tsieina a Rwsia feddwl ddwywaith, gallai fod yn beth da."

Mae arweinydd y Blaid Werdd, Zack Polanski, wedi galw ar y Prif Weinidog i gondemnio ymosodiadau milwrol yr Unol Daleithiau yn Venezuela fore Sadwrn.

Dywedodd Mr Polanski: “Dylai’r Prif Weinidog a’r Ysgrifennydd Tramor fod yn condemnio’r ymosodiad anghyfreithlon hwn a thorri cyfraith hawliau dynol rhyngwladol."